[A:301b]ba rnams la bde skyid phun sum tshogs pa stsal ba'i tshul ni/ mtsho sgo rnam rgyal rtag rtse phyogs su lo du ma'i bar du lo nyes brgyud mar byung nas 'gro ba rnams mu ges nyen pa na/ rje nyid kyi zhabs kyis bcags pa tsam gyis dus de nas bzung ste da lta'i bar du lo legs skya rgyal ba'i ngang du gyur pa dang / de dus mtsho sgo na mtsho zhig yod pa la/ rje nyid kyi zhabs bskor mdzad pas/ bdag nyid chen po gang du phebs pa'i phyogs su mtsho la gnas pa'i srog chags nya sbrul 'jong mo sogs bsu ba'i tshul gyis mgo rnams rog rog por bsgrigs nas gus 'dud byed pa yang byung ngo zhes thos shing / gzhan yang gdong dga' gzhis chen phyogs su yang skya mug chen pos 'gro ba rnams nyam thag pa na/ bdag nyid chen pos sa phyogs der bum gter 'jug pa dang / phyag nas sogs mdzad pa'i legs lam la brten dus rtag tu lo phyugs legs shing bde skyid phun sum tshogs pa byung ba sogs yongs su grags shing / gdan sa 'dir yang bar skabs shig tu skye bo mi srun pa dag gi bsam sbyor ngan pa'i 'khrul 'khor la brten nas/ lo dgra sad ser ba sogs dus rgyun du byung ba'i tshe/ slob 'bangs rnams kyis gsol ba btab pa'i ngor bdag nyid chen pos bla ma gong ma rnams kyis lo dgra'i gnyen por bzhengs par mdzad pa'i rigs gsum mgon po'i mchod rten la nyams gso mdzad par bzhed de/ rje nyid dpon slob rnams kyis rim pas chag phebs te/ rigs gsum gyi mchod rten rnying pa'i zhig ro'i dmigs gang na yod 'tshol bar mdzad pa'i tshe/ sku 'khor rnams kyis yun ring du ma rnyed