[A:299b]dngos su bstan par gdon mi za zhing / tshe gzungs bsnyel ba'i tshul de yang / de'i tshul skye bo mang po zhig gis rig na sku tshe'i bar chad du gyur dogs pa la dgongs par mngon no/ /de dag la 'di skad ces bstod de/ mgon khyod rim gnyis don la gzhol ba'i tshe/ /rje btsun dkar po rnam gsum tshe dpag med/ /nag po chen po 'od gsal ngang nas gzigs/ /lha yis tshe gzungs gtad pa de la 'dud/ /ces so/ /gzhan yang bstan srung dbang po rnams sogs lhag pa'i lha du mas dngos dang rnam 'phrul mtha' yas pa'i sgo nas zhal bstan cing byin gyis brlabs pa'i tshul 'di ltar yang thos te/ rje nyid dpal mgon zhal bzhi pa'i gsung bsnyen la bzhugs pa'i dus shig gi tshe/ da lta zhing skyong mar grags pa'i hor sil khyad par can 'di nang par phyag tu 'byor rgyu'i do nub mnal lam du/ mi smug tshon pa zhig gis ras kyis dril ba'i sil snyan zhig rgyab la khyer te shar phyogs nas byung ba'i rjes su mi skya shar ba zhwa theb gyon pa mang po dang / ban chung mang po lung pa khengs pa tsam slebs byung bas/ de ma thag a tsa ra nag po 'jigs su rung ba gnyis glo bur du byung nas/ sngar gyi mi skya shar ba dang ban chung thams cad khong gnyis kyis lung pa ma brgal gyi bar du phyir bskrad de/ de'i mod la mi smug tshon pa de drung du slebs pa dang mnyam du mnal sad byung ba na ci yin nam snyam du dgongs pa'i tshe/ de'i nyin mo hor sil 'di mnal lam du byung ba bzhin ras dril dang bcas nas zhabs drung du 'byor byung ba'i tshe nyid kyi gsung las/ sil snyan khyad par can 'di chos skyong zhal