[A:290b]gshegs shing / chung ba ngag dbang bsod nams chos kyi dpal 'dzom bya ba dge bsnyen ma zhig ste gzhon nu la dge sdings su gshegs so/ /yang sngags 'chang bstan pa'i nyi ma kun dga'i mtshan can gyi btsun mo slar yang gdong dga' ma bkra shis dpal gyi bu khrid ces bya ba khab tu bzhes pa la sras gcig 'khrungs pa ni/ bdag la bka' drin che ba'i bla ma gsum gyi nang tshan/ /sngon gyi dus su byang chub sems dpa' mkhan po bo dhi sa twa nyid 'gro ba'i mgon po dpal ldan bla ma dam pa bsod nams rgyal mtshan zhes mtshan yongs su grags par sku'i skye ba bzhes pa de nyid/ slar yang sa skya pa'i gdung rigs su bsams bzhin du byon pa dpal sa skya pa chen po sngags 'chang grags pa blo gros rgyal mtshan dpal bzang po zhes mtshan yongs su grags pa de nyid de/ bdag nyid chen po 'di ni yab sngags 'chang bla ma bstan pa'i gsal byed chen po de ni dgung lo bzhi bcu rtsa bdun du phebs pa chu mo phag gi lo smal po zla ba'i gnam gang gi nyin gdan sa chen po'i nub phyogs gdong dga' rdzong gi yang rtser ngo mtshar ba'i ltas du ma dang bcas bltams pa yin te/ 'di nyid lhums su zhugs pa'i dus su yang yum la mtshan ltas khyad par can du ma byung zhing / bltams pa'i tshe yang mngal gyi dri mas ma gos pa mtshon pa'i phyir/ bla ma sa skya pa chen po kun dga' snying po ltar grod gtum gyi tshul du legs par 'khrungs shing / 'khrungs ma thag nas byis pa'i spyod pa las 'das pa skyes bu chen po'i mtshan dang ldan pa zhig yin no zhes thos la/ de nas yon tan gyi phyi mo 'dri klog la sogs pa rnams ni