[A:286b]dung nar tsam phebs skyel la 'gro lags zhus pas/ da ni 'di rang du bzhugs pa legs/ phur sgrub kyi tshogs dpon la 'byon mi dgos pa e yin/ tshogs dung kyang phyis 'gro nyan yod do zhes gsung byung ba bzhin dgongs pa dang sbyar la tshur log de nas rje nyid kyis rim gyis chibs kyi kha lo bsgyur te rtse gdong bla brang du chag phebs nas bzhugs pa'i skabs su/ gzhan ngor sku cung zad bsnyung ba'i tshul bstan cing zhing khams gzhan du 'byon par nye ba na/ de'i lnga ltas su 'jig rten gyi khams su rlung 'tshub chen pos sa gzhi g.yo ba lta bu la sogs pa ltas ngan pa dpag tu med pa yang byung zhing / de'i dus su rje 'dis rgyun du chibs pa mdzad pa'i nor bu 'phur shes bya bde glo bur du shi ba na/ rje'i gsung gis da mi rgan dang rta rgan mnyam du 'gro ba yin zhes gsungs pa dang / gzhan yang sku 'khor rnams la sngon sngags 'chang chen po zhing gshegs pa'i tshe sku gdung la zhabs tog mdzad tshul sogs 'phros gtam gyi tshul gyis zhing khams gzhan du gshegs pa'i gsung 'ba' zhig byon pa na/ zhabs 'bring ba rnams mya ngan gyi khang bur zhugs par gyur te/ sku rim sogs rgya chen po bsgrub cing / gsol sman sogs kyi 'phrod rten gang mang zhig phul kyang sku la skyed du mngon pa zhig ma byung ba na/ de nas bdag nyid chen po 'di gzhan snang du sku dub pa'i tshul bstan kyang / gsung las/ nged rang gi dngos po rgyal rtse dang rtse gdong sogs phyogs na yod pa rnams myur du dge sdings rang du sgril cig de rnams kyi 'gro sa cig stod phyogs ya gi na yod pa yin no zhes gsungs