[A:28a]nub sgo'i 'khris kyi chu 'gram na mchod rten gyi tshul du mnan pa mdzad pa yin pas/ 'di la ched gtad kyi bskor ba mi bya zhing / gal te byed kyang mgon po'i rtsa sngags dang bzlog bsad kyi sngags rnams bzla zhing bskor ba g.yon skor du bya ba yin par gsungs so/ /'dir skabs kyi rje sa chen gyi dngos slob khams pa rdor rgyal dang / bde gshegs khams pa rdor rgyal gnyis ming zur 'dra yang ngo bo mi gcig ste/ phag gru'i mtshan la rdo rje rgyal mtshan zhes bya zhing / 'di'i ming la rdo rje rgyal po zhes zer ro/ /de lta bu'i sngags nag dang bon nag gi lo rgyus 'di rnams ni sa lo 'jam pa'i rdo rje'i gsung rgyun yin zhes sngags 'chang chos kyi rgyal po ngag dbang kun dga' rin chen gyi bka' phebs ji ltar gnang ba bzhin 'jam pa'i dbyangs sku mched gnyis ka'i gsung las thos pa dang / lhag par 'jam dbyangs bsod nams dbang pos sa skya'i gnas bshad gsung rtsom gnang 'phro thor bur yod pa rnams las ji ltar 'byung ba bzhin bkod pa yin la/ gzhan yang bla ma de nyid kyis rdzu 'phrul bstan pa'i tshul ni/ skabs shig tu khams pa cig gis khyed spyan ras gzigs yin pa'i rtags mngon sum du mi ston na kho bo 'di nyid du 'gum mo zhes gri snying gar btsugs pas/ de btsugs mi dgos 'di la ltos gsungs nas phyag mthil nas spyan bstan pa sogs mtha' yas so/ /de lta bu'i bla ma chen po de nyid la slob ma'i mchog ji ltar byung snyam na/ kun gyi mchog ni slob dpon dpal ldan rtse mo zhabs te chos dang rigs kyi sras su gyur