[A:27b]gdams pa'i nying khu rnams gnang ste/ rdor rgyal gyis kyang khams su phyin te bsgoms pas grub rtags chen po phyogs med du ston pa'i rnal 'byor pa bar dor phyag chen mchog gi dngos grub thob nges pa zhig byung bar grags so/ /de nas bla chen gyis sngags nag gi snying phyung ste hom khung gi nang mdze thod kha sbyor gyi nang du bcug nas bse mgon chen po'i zhal gdong du 'jog par mdzad de/ mngon spyod kyi 'phrin las ci bsam 'grub pa'i bka' bsgo mdzad pa yin la/ dus phyis bstan pa'i nyi ma sngags 'chang chos kyi rgyal po ngag dbang kun dga' rin chen gyis kyang bse 'bag gi zhal gdong gi hom khung kha phye nas mdze thod kyi nang gi snying la nyams pa'i dgra bo lha gnas gnyis sogs la dmigs pa'i dgug gzhug lha dbye bden bdar sogs mdzad pas/ dam nyams rnams gtan brlag tu thod pa 'di bzhin byung ba yin zhes bdag gi bla ma 'jam dbyangs sku mched kyi gsung las yang yang du thos shing / da dung yang sa skya pa'i sde bstan pa gdung brgyud dang bcas pa la gnod pa'i bstan dgra mi bsrun pa dag la shin tu myur ba'i las sbyor dgos pa byung ba'i tshe bsam pa rnam par dag pas kun nas bslangs te bla ma gong ma de rnams kyi phyag len ltar bgyis na rtags mtshan 'byung ba la the tshom mi dgos sam snyam du kho bo sems so/ /sngags nag gi phung po bying sgo rum mgon khang gi them 'og tu bla chen nyid kyis mnan pa mdzad pa bzhin da lta yang dbu rtse'i bskor lam nas phung po'i snod kyi rkyal pa kun gyis mthong sar yod do/ /bon nag re ba 'dzu gu'i phung po ni chos khri thang mo che'i