[A:27a]ba'i mdud pa bkrol te spyod lam du 'dor ba sogs mi mtshungs pa sna tshogs byas shing / de bzhin du bon nag la yang byas pas/ khong gnyis kyi ngan sngags kyi tshogs rnams shin tu 'khrugs par gyur to/ /de nas de'i skabs der nus mthu'i mnga' bdag bla chen kun dga' snying po de nyid kyis chos skyong mthu rtsal can rnams bran du bkol te/ drag po mngon spyod kyi las la bskul ba'i tshe/ sngags bon gnyis 'dug pa'i gnas der sngar nas med pa'i g.yag rgod rog po gnyis rwa brdar la sogs pa drag po'i spyod pa zil dang ldan pa du ma byed pa zhig byung zhing / gzhan yang bya nag khyi nag ce spyang sogs chos skyong gi sprul pa bsam gyis mi khyab pa'ang de'i dus byung zhes grags la/ de dang dus mtshungs par dam tshig ldan pa'i khams pa rdor rgyal des/ sngags nag dang bon nag gnyis kyi slob 'khor rnams phyogs gzhan du byer ba'i thabs byas nas/ de nas khong rang gcig pus zhag bcu phrag gsum gyi bar du sngags bon gnyis kyi zhabs tog la ches cher brtson par ltar byas nas/ zhag sum cu lon pa nyer dgu'i nub/ bla ma dang bstan pa'i ched du sngags nag dang bon nag gnyis srog bral gyi cho ga yang dag pa la sbyar nas/ khong gnyis kyi phung po gnyis chos skyong gi sprul pa'i g.yag rgod la bkal te gdan sar 'ong bas/ mtshan lam gcig la nyin lam drug chod ces grags shing / de nas khams pas bla chen gyi drung du phung po gnyis phul bas shin tu dges shing bya dga' chen po gnang zhing / khyad par tshe gcig lus gcig la sangs rgya nges pa'i