[A:261b]phebs te spyan snga rin po che ngag dbang chos grags kyi drung du thugs sras dam pa dbang po'i zhabs kyis rab tu byung ba dge tshul gyi sdom pa rnam par dag pa mnos par mdzad cing / bdag nyid chen pos kyang spyan snga rin po cher zab chos 'ga' zhig gsan te/ de nas yab sras lhan cig tu lha sar phebs nas der bstan pa dang sems can la phan pa'i smon lam rgya chen po dang / khyad par jo bo rang byon lnga ldan bcu gcig zhal de nyid la dad ldan rnams kyis gser chab gsol ba stobs ches pa'i zhal dkyil gas pa lta bu'i shin tu ma mdzes pa zhig dang / sku de nyid cung zad mdun du bub nas 'dug pa la/ bdag nyid chen pos thabs la mkhas pa'i sgo nas snga mo ltar jo bo'i zhal dkyil shin tu yid du 'ong ba mdzad cing / mdun du bub pa'i rnam pa yod pa de la yang bdag nyid chen po'i phyag gis sku rgyab tu 'phul ba'i steng ka tsam mdzad pa na/ sku de nyid rang bzhengs kyi tshul gyis shin tu 'drongs pa byung zhes yongs su grags pa dang / skabs der bdag nyid chen po yab sras rnams skyid shod pas gdan drangs te/ gzhis dga' bde chen du phebs pa'i skabs su gter ston zhig po gling pa dang mjal nas/ de las bdag nyid chen pos gter chos mang du gsan cing / gzhan la yang rgya cher spel bar mdzad bzhin pa'i tshe/ bsam yas nas chos skyong chen po sogs lha mi rnams kyis gdan 'dren gyi pho nya mngags pa na slar yang bsam yas su phebs nas/ der chos skyong chen pos/ bdag nyid chen po rang nyid kyi gcen bdag chen kun dga' bsam grub pa gnyis char gyis bsam