[A:261a]bsdus/ lcog pa rnams la maNDal phul zhig par bka' gnang nas/ chos skyong rang gis kyang bse rmog phud cing / ral gri dang zhags pa yang der bzhag nas/ sngags 'chang nyid kyi drung du thal mo sbyar te sa skya pa chen pos nged zab yangs mthil gyi lha mi 'dir tshogs rnams la bla ma'i rnal 'byor gyi byin rlabs shig gnang ba dgos zhu ba la/ bdag nyid chen pos kyang thugs dges bzhin du lam zab mo bla ma'i rnal 'byor rgyas pa stsal ba'i tshe/ de ma grol gyi bar la bdag nyid chen po'i g.yon phyogs kyi sa dang bar snang thams cad la sngon slob dpon padmas dam btags kyi gnas kha so so'i srung ma rnams dang / gzhan yang gzugs med kyi rigs bsam gyis mi khyab pa zhig 'dus nas/ sngags 'chang nyid la gus 'dud dang bcas 'dug pa mkhan tshang pa bstan pa dar rgyas kyis mngon sum du mthong zhing / de dang dus mnyam du chos skyong chen pos kyang bdag nyid chen po'i sku'i g.yon phyogs la yang yang gzigs nas brda mang du mdzad cing / phyogs der mi su yang 'gror mi 'jug pa der yod kun gyis mthong bar grags pa dang / de'i tshe bdag nyid chen po'i gsung las kyang / de ring gi chos nyan pa rnams kyi khrod na sems can mgo lus mi gcig pa mang po 'dus nas bzhed po 'dug pa khyed tshos e mthong zhes zhabs 'bring pa rnams la gsung bar grags la/ de ltar bsam yas mi 'gyur lhun gyis grub pa'i gtsug lag khang der bod kyi bde skyid la phan pa'i mdzad pa mtha' yas pa zhig mdzad nas/ de nas lo dgon par