[A:259b]gsal bar gyur pa lags so/ /de lta bu'i sngags 'chang bla ma bdag nyid chen po des gdan sa chen po'i 'dzin skyong spel gsum rnams dang / dad ldan gyi gdul bya rnams la chos kyi 'khor lo bskor ba/ skabs 'gar dben gnas rnams su thugs dam zab mo'i rim pa la rtse gcig tu bzhugs pa sogs chos dang mthun pa'i mdzad 'phrin kho na'i ring nas bstan pa'i rtsa ba gdung sras rgyun ma chad par byon pa nyid yin par dgongs pa'i rgyu dang / bdag nyid chen po'i rigs kyi cod pan dam pa rje dkon mchog lhun grub/ spyan snga ngag dbang chos grags/ rgyal sras dpal ldan bkra shis/ rje btsun kun dga' grol mchog rnams gtso bor gyur pa'i rje btsun sa skya pa'i bstan pa thugs khongs su bcangs pa'i bla ma dge ba'i bshes gnyen mang po dang / dbus gtsang gi skyong ba sa skya pa'i bstan pa'i sbyin bdag chen po rnams kyis gdung rigs spel ba mdzad dgos pa'i gsol ba drag tu btab pa'i rkyen la brten/ bdag nyid chen po 'dis btsun mo gsum tsam zhig khab tu bzhes nas/ rigs kyi gdung sras dam pa gcen 'jam pa'i dbyangs bsod nams dbang po grags pa rgyal mtshan dpal bzang po zhes bya ba grub pa'i 'khor los sgyur ba po de nyid dang / gcung sngags 'chang grags pa blo gros rgyal mtshan dpal bzang po zhes bya ba byang chub sems dpa' chen po zhi ba 'tsho'i rnam par sprul pa de nyid de gdung sras dam pa sku mched gnyis bskrun par mdzad cing / de nas rigs sras dam pa de gnyis la bdag nyid chen po rang la ji ltar bzhugs pa'i zab chos rnams kyang legs par stsol bar