[A:257b]nyid kyi drung du phebs pa la sogs pa ngo mtshar ba'i ltas bsam gyis mi khyab pa zhig byung bar grags so/ /de ltar sngags 'chang bla ma 'dis rten gsum gtsug lag khang dang bcas pa'i nyams gso dang gsar bzhengs sogs bstan pa'i bya ba rlabs po che du ma mdzad nas/ slar yang sa lo chen po'i bka' chem dang / bstan pa'i rtsa ba dge 'dun gyi sde la rag las par dgongs nas/ bstan pa'i bya ba thos bsam sgom gsum dang / mkhas pa'i bya ba 'chad rtsod rtsom gsum gyi sgo nas bstan pa rin po che spyi dang bye brag dpal ldan sa skya pa'i mdo phyogs kyi bstan pa yar ngo'i zla ba ltar 'phel rgyas su 'gyur ba'i gzhi chos grwa chen po thub bstan lha chen zhes snyan pa'i gdugs dkar srid rtse'i bar du khyab pa'i chos kyi grwa chen po de nyid 'debs par mdzad cing / der bzhugs kyi dge 'dun tshogs pa rnams kyis legs par gsungs pa'i chos 'dul ba nas 'byung pa bzhin gyi spang blang rnams g.yel med du bya dgos tshul dang / chos spyod kyi rim pa sogs ji ltar bya ba'i rnam gzhag ston pa/ mdo rgyud bstan bcos thams cad kyi snying po phyogs gcig tu bsgrigs pa lta bu'i bca' yig ngo mtshar rmad du byung ba zhig kyang mdzad de/ /de la brten nas lung rigs kyis thugs rgyud phyug pa'i bstan 'dzin bgrang ba las 'das pa zhig byon nas/ spyi dang bye brag gi bstan pa nyin mo ltar gsal bar mdzad pa ni rnam thar rnams kyi nang nas kyang mchog tu shes par bya'o/ /de nas de'i rjes tsam nas gsang sngags bde chen gling bya ba/ spyir rgyud sde mtha' dag dang / khyad par rje btsun sa skya pa'i