[A:257a]gsum sogs ngo mtshar yid du 'ong ba ji snyed cig yod pa de dag la yang so so'i drung du ting bdun tshar/ rdo rje dril bu/ rol mo/ sa rgyan/ gnam rgyan/ snyan dar sogs so so skye bo'i blos dpag par dka' ba zhig 'bul bar mdzad ces yongs su grags shing kun gyi mig gi spyod yul du gyur pa 'di dag go /gzhan yang ngo mtshar bkod pa rmad du byung zhing yid 'phrog pa'i khang bzang yang lhun grub pho brang sogs bsam gyis mi khyab pa zhig gsar du 'debs par mdzad cing / de ltar gtsug lag khang gsar bzhengs dang / sngar yod rnams nyams pa gso ba mdzad pa'i skabs der spyir ngo mtshar gyi mdzad pa bsam gyis mi khyab pa zhig dang / khyad par 'bum thang chen mo'i zhig gsos kyi skabs/ nyin gcig gi tshe/ las mi mang po tsha ba byed skabs spyi khang gi 'gram bcag chen po zhig yod pa glo bur du zhig nas thams cad ci bya gtol med du gyur pa'i tshe/ sngags 'chang nyid kyi thugs rjes las mi rnams la sa rdo gang gis kyang gnod pa ma byung zhing / de'i rjes su bdag nyid chen po gzigs rtog la phebs pa na/ sa rdo'i gseb na shing leb gcig la yi ge dbu can khral le ba gsal po rang min pa zhig brkos nas 'dug pa la khrus gsol nas yi ge de nyid bklags pa na/ da lta'i zug rgyab pa 'di ni mahA kA la'o zer ba 'dug pa/ de'i tshul bdag nyid chen po la zhus pas/ he he de nga la zer ba yin pa 'dra zhes gsungs par grags pa dang / gzhan yang sgo rum la nyams gso mdzad skabs kyang bse 'bag nag po 'phur shes sngags 'chang