[A:26a]lha khang du 'jam dbyangs nam mkha' dri med kyi dkyil 'khor bzhengs nas rab gnas mdzad pa/ zangs sdong 'brog pa'i gseb tu gsung ngag gsungs pa/ shab sgo lngar chos 'khor bskor ba rnams lo zla tshes grangs gcig par 'dug pa la/ phyis sku gshegs nas slob ma rnams gsung gleng mdzad pa ma gtogs sus kyang rtogs pa mi 'dug pas/ de ni dus gcig la sku'i bkod pa drug bstan pa yin par grags so/ /yang mthu rtsal gyi sgo nas bstan dgra gdug pa can rnams tshar bcad pa'i tshul ni/ bdud sprul sngags nag bla chen stag tsha dang / bon nag re ba 'dzu gu zhes bya ba gnyis kyis bstan 'dzin rnams la shin tu phrag dog pa'i sgo nas/ brtse ba chen po kun dga' snying po nyid la yang bar chad mtho 'tshams byed snyam ste/ stag tsha'i slob ma khams kyi ldan ma nas 'ong ba'i ming rdor rgyal zer ba cig gser gyis slad nas bla chen bkrong du btang bas/ khams pa des kyang khas blangs nas sa skyar 'ong ba'i tshe/ brtse ba chen po kun dga' snying po de sgo rum gzims spyil dkar por bzhugs yod pa la/ khams pa des mjal kha zhus pa na de 'phral sku gzhogs su gnang ba'i tshe/ khams pa na re/ bdag skyes sa khams kyi ldan ma yin/ zhing stod kyi phyogs su phyin nas lo du ma song / de nas bla chen khyed kyi snyan pa thos nas dad pa chen pos mjal du 'ong ba lags/ da re zhig khyed kyi zhabs drung du bsdad chog par zhu ba la de bzhin du gnang zhing / gzhan yang 'phral du khams pa des gus gus ltar gyi thabs ci 'dra zhig byas nas bkrong ba drag