[A:255b]spen 'dzugs dang ru shing la 'jim pa phal cher g.yogs grub mtshams/ glo bur du rlung dmar chen po zhig langs te/ gur bsgyel zhing las bya byed dang bral bar gyur pa'i tshe/ lha bzo bas sngags 'chang nyid la de'i tshul rnams zhus pa na/ bdag nyid chen po thugs 'ur nyams dang bcas 'phral du phebs te/ gzims chung gi mdo'i g.yabs steng nas dkar gong zhig bsnams nas/ mgon po'i skya bzo phal cher grub pa de la bsnun pa gnang song bas/ skya bzo'i sku'i nu ma g.yas pa'i 'og tsam du thim song zhing / de mthun gsung las/ nga sa skya'i sde gog po 'di 'dzin pa dang / gtsug lag khang khyad par can 'di dam nyams tsho'i lag tu mi 'khyar bar bya ba'i phyir mgon khang zhig bzhengs bsams pa la/ nag bgrad khyod gtor ma bza' yin sdod pa ma gtogs rlung po 'di tsam srung ba'i nus pa yang med pa a yin/ zhes gsung shugs chen po dang bcas gnang ba na/ de ma thag rlung dmar thams cad rang zhir gyur cing / dus de nas bzung mgon khang nam grub kyi bar la rtsub 'gyur gyi rnam pa cung zad kyang ma byung ba yin no zhes kyang thos so/
/de lta bu'i sngags 'chang bla ma des gzhan yang sa skya pa chen po la 'jam dbyangs dang mi g.yo ba sgrol ma rnams zhal gzigs pa'i gnas sa chen phug tu grags pa dang / sa chen gyi dngos slob phag mo grub pa'i gsung ngag gsan nas sgrub pa mdzad pa'i gnas phag mo phug tu grags pa gnyis su yang gtsug lag khang khyad par can so so'i nang du rnam thar dang mthun pa'i sa 'jam dang / sa chen phag gru rnams kyi sku 'dra yid du 'ong