[A:248b]la/ thub pa'i dgongs pa gsal ba zhes bya ba'i bstan bcos chen po yongs rdzogs/ dag gsal snyan pa'i gsung gis nyi ma gsum gyi bar du legs par bshad pas/ skye bo mkhas blun thams cad kyi dad gus chen pos mchog tu bsngags pa'i gnas su gyur cing / de nas bdag nyid chen po 'di'i rtse gdong du phebs nas/ slar yang dgung lo bcu bgrang tsam bzhes pa na gdan sa chen por phebs te/ de dus gdan sa'i shar phyogs 'phrang ring gi mgor phebs pa na/ chu mig rdzing kha phyogs kyi mchod rten mang po zhig pa'i nag srol le ba de gzigs pa dang / bdag nyid chen po 'di'i thugs dgongs la/ kye ma bdud sprul rnams kyi byed pas sde mang po zhig ral du song 'dug 'di thams cad zhig gsos byas/ gtsug lag khang rnams dang / sde 'di tshags su bcug ste khra chem me ba zhig nged la nam yong ngam snyam pa'i nges 'byung dang / lhag bsam yid la nan ltar gcags pa zhig byung zhes bdag nyid chen po rang gis yang yang gsungs so zhes grags shing / de nas sa lo chen po'i drung du bzhugs te/ de'i skabs nas rje 'di dgung lo bcu bdun bzhes pa tshun chad du sa lo nyid dang 'bral med du bzhugs nas gong du bstan pa'i zab chos rnams kyang gsan par mdzad cing / sa lo nyid phyogs su 'gro don la phebs pa'i tshe yang zhabs phyir 'brangs te dbang rjes gnang sogs gnang ba'i mchod g.yog rgyun par mdzad/ gdan sa chen por bla ma gong ma'i sgrub mchod dang / gtor bzlog sogs kyi chag phyir yang rgyun par phebs te dbyangs rol phyag rgya'i gar 'chams sogs