[A:241a]bdag po yab yum bran bzhin du 'khol nus pa sogs nus mthu'i mnga' bdag du grags la/ bstan pa'i bya ba yang gsung ngag bla ma brgyud pa'i bris thang shin tu ngo mtshar ba bzhengs pa la sogs pa rten gsum mang du bzhengs shing / gzhan yang 'chad nyan sogs kyang ci rigs pa mdzad/ mthar dag pa'i gzigs snang sogs ya mtshan rmad du byung ba'i ltas du ma dang bcas gdan sa rtse gdong nyid du sku zhi bar gshegs pa'i tshul bstan to/ /bla ma 'dis ya 'brog ma khri lcam khab tu bzhes pa la sras gnyis 'khrungs pa'i che ba 'jam dbyangs kun dga' bsam 'grub ni gzhon nu nyid nas grub pa'i sa brnyes pa'i ngo mtshar ba'i mdzad pa mang du mdzad cing / sa lo thams cad mkhyen pa sku mched rnams dang / yongs 'dzin dkon mchog lhun grub sogs las zab rgyas gsan pa rgya mtsho'i mdzod bzung ste/ thugs dam la brtson pa'i ngang nas spyir grub rtags du ma dang / khyad par chos skyong gdong bzhi pa la bka' bsgo mdzad pas 'bri mo zhig la be'u rwa lnga byas pa zhig skyes pa'i mgo bo da lta yang rtse gdong na yod ces thos la/ mdor na grub pa'i mdzad pa ya ma zung gi sgo nas 'os su gyur pa'i gdul bya rnams 'dul bar mdzad de/ mthar gzugs sku bsdu ba'i tshe yang ngo mtshar ba'i ltas du ma dang bcas te de dag pa'i zhing du gshegs so/ /de'i gcung 'gran zla dang bral ba'i skyes chen dam pa khams gsum chos kyi rgyal po dus gsum gyi sangs rgyas/ srid pa gsum gyi 'dren mchog dam pa dpal sa skya pa chen po sngags 'chang ngag gi dbang po kun dga'