[A:238a]grub pa brnyes pa'i rtags dang mtshan ma bsam gyis mi khyab pa mnga' bas/ 'phags pa sdud pa tshigs su bcad pa sogs shes rab kyi pha rol tu phyin pa'i gzhung lugs rnams las byang chub sems dpa' rnams kyi phyir mi ldog pa'i rtags su gang bshad pa thams cad bdag nyid chen po 'di la mnga' ba yin la/ de bas na rje btsun sa skya pa zhes snyan pa'i grags pas rgya mtsho'i gos can yongs su khyab pa'i gdung gi rigs su 'khrungs pa la/ bdag nyid chen po sa skya paNDi ta kun dga' rgyal mtshan dpal bzang po zhes mtshan gyi dge legs tsam gyis kyang skal ldan blo gsal rnams kyi snying gi chu skyes bzhad par nus pa de nyid khu dpon dang / bod yul mun pa'i gling 'dir dam pa'i chos kyi sgron me chen po legs par spar te/ byang grol thar pa'i lam gyi rgyu'i gtso bo lhag pa tshul khrims kyi bslab pa rin po che'i srol chen kha ba can gyi ljongs 'dir gsar du btod par mdzad pa'i byang chub sems dpa' chen po zhi ba 'tsho'i rnam par sprul pa'i sku dpal ldan bla ma dam pa bsod nams rgyal mtshan dpal bzang po zhes snyan pa'i ba dan dkar po sa gsum na g.yo ba ste skyes mchog de dag byon pa'i phyi nas bdag nyid chen po 'di bas mkhas pa'i yon tan phul du byung ba gzhan ma byon par sa chen po la gnas pa'i skye bo mkhas blun yongs la grags shing grub la/ btsun pa dang bzang po'i yon tan gnyis ni rgyas par phye na bsam gyis mi khyab mod/ mdor bsdus pa ni/ ji skad du/ khyod thugs dag pa'i nam mkhar tshigs gsum gyi/ /tshul khrims yar ngo'i cha shas gong 'phel