[A:237b]srung ma rnams kyi zhal gzigs lung bstan dbugs dbyung mdzad cing / de la brten nas nang du ting nge 'dzin gyi sgo du ma yang mngon du mdzad/ phyi rol du grub pa'i mtshan ma bsam gyis mi khyab pa la mnga' mdzad pa zhig ste/ de yang bdag nyid chen po 'dis lha sar jo bo shAkya mu ne mjal bar phebs pa'i lam du skye chu bya ba'i chu bo de la grur zhugs nas phebs pas gru bying nas shin tu nyen che ba byung ba na/ rje 'dis rje sangs rgyas rin chen la gsol ba drag tu btab pas/ bya rog cig gru'i rta mgo'i steng du byung nas 'jigs pa las grol ba dang / gzhan yang bdag nyid chen po 'dis byang rwa sgreng bskor bar phebs te slar yar phebs pa'i lam du bla ma dge dga' ba bya ba dang / mal gro sgrub chen pa'i slob ma bla ma sbal pa blo gros bya ba sbyor drug gi thugs dam shin tu smin pa gnyis kyi rmis ltas su/ rje 'di 'jam dbyangs dngos yin pa'i mtshan ma sogs rtags khyad par ba mang du byung bar grags pa dang / khyad par 'bab rong gi gnas mchog tu phebs pa'i tshe/ phebs lam gyi brag srub cig tu skye bo mang po la 'dre srin gyi gnod pa mi 'byung ba'i phyir rdo la zhabs kyi rjes shin tu gsal ba 'jog pa mdzad pa na/ de nyid kyi snyan grags la brten sku tshe'i bar chad du song dogs/ /mtho'i 'og tu gnon gsungs pa'i bka' phebs pa bzhin 'khor rnams kyis bka' bzhin bsgrub ces nyid kyi sku 'khor ba rnams gleng bar grags shing / gzhan yang der skabs dgun shin tu grang ba'i dus yin yang / brag gseb nas 'jam dbyangs me tog mang po 'khrungs pa sogs mdor na de dag la sogs pa