[A:༢༣༨ན]གྲུབ་པ་བརྙེས་པའི་རྟགས་དང་མཚན་མ་བསམ་གྱིས་མི་ཁྱབ་པ་མངའ་བས། འཕགས་པ་སྡུད་པ་ཚིགས་སུ་བཅད་པ་སོགས་ཤེས་རབ་ཀྱི་ཕ་རོལ་ཏུ་ཕྱིན་པའི་གཞུང་ལུགས་རྣམས་ལས་བྱང་ཆུབ་སེམས་དཔའ་རྣམས་ཀྱི་ཕྱིར་མི་ལྡོག་པའི་རྟགས་སུ་གང་བཤད་པ་ཐམས་ཅད་བདག་ཉིད་ཆེན་པོ་འདི་ལ་མངའ་བ་ཡིན་ལ། དེ་བས་ན་རྗེ་བཙུན་ས་སྐྱ་པ་ཞེས་སྙན་པའི་གྲགས་པས་རྒྱ་མཚོའི་གོས་ཅན་ཡོངས་སུ་ཁྱབ་པའི་གདུང་གི་རིགས་སུ་འཁྲུངས་པ་ལ། བདག་ཉིད་ཆེན་པོ་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོ་ཞེས་མཚན་གྱི་དགེ་ལེགས་ཙམ་གྱིས་ཀྱང་སྐལ་ལྡན་བློ་གསལ་རྣམས་ཀྱི་སྙིང་གི་ཆུ་སྐྱེས་བཞད་པར་ནུས་པ་དེ་ཉིད་ཁུ་དཔོན་དང་། བོད་ཡུལ་མུན་པའི་གླིང་འདིར་དམ་པའི་ཆོས་ཀྱི་སྒྲོན་མེ་ཆེན་པོ་ལེགས་པར་སྤར་ཏེ། བྱང་གྲོལ་ཐར་པའི་ལམ་གྱི་རྒྱུའི་གཙོ་བོ་ལྷག་པ་ཚུལ་ཁྲིམས་ཀྱི་བསླབ་པ་རིན་པོ་ཆེའི་སྲོལ་ཆེན་ཁ་བ་ཅན་གྱི་ལྗོངས་འདིར་གསར་དུ་བཏོད་པར་མཛད་པའི་བྱང་ཆུབ་སེམས་དཔའ་ཆེན་པོ་ཞི་བ་འཚོའི་རྣམ་པར་སྤྲུལ་པའི་སྐུ་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་དཔལ་བཟང་པོ་ཞེས་སྙན་པའི་བ་དན་དཀར་པོ་ས་གསུམ་ན་གཡོ་བ་སྟེ་སྐྱེས་མཆོག་དེ་དག་བྱོན་པའི་ཕྱི་ནས་བདག་ཉིད་ཆེན་པོ་འདི་བས་མཁས་པའི་ཡོན་ཏན་ཕུལ་དུ་བྱུང་བ་གཞན་མ་བྱོན་པར་ས་ཆེན་པོ་ལ་གནས་པའི་སྐྱེ་བོ་མཁས་བླུན་ཡོངས་ལ་གྲགས་ཤིང་གྲུབ་ལ། བཙུན་པ་དང་བཟང་པོའི་ཡོན་ཏན་གཉིས་ནི་རྒྱས་པར་ཕྱེ་ན་བསམ་གྱིས་མི་ཁྱབ་མོད། མདོར་བསྡུས་པ་ནི། ཇི་སྐད་དུ། ཁྱོད་ཐུགས་དག་པའི་ནམ་མཁར་ཚིགས་གསུམ་གྱི། །ཚུལ་ཁྲིམས་ཡར་ངོའི་ཆ་ཤས་གོང་འཕེལ་