[A:༢༣༧བ]སྲུང་མ་རྣམས་ཀྱི་ཞལ་གཟིགས་ལུང་བསྟན་དབུགས་དབྱུང་མཛད་ཅིང་། དེ་ལ་བརྟེན་ནས་ནང་དུ་ཏིང་ངེ་འཛིན་གྱི་སྒོ་དུ་མ་ཡང་མངོན་དུ་མཛད། ཕྱི་རོལ་དུ་གྲུབ་པའི་མཚན་མ་བསམ་གྱིས་མི་ཁྱབ་པ་ལ་མངའ་མཛད་པ་ཞིག་སྟེ། དེ་ཡང་བདག་ཉིད་ཆེན་པོ་འདིས་ལྷ་སར་ཇོ་བོ་ཤཱཀྱ་མུ་ནེ་མཇལ་བར་ཕེབས་པའི་ལམ་དུ་སྐྱེ་ཆུ་བྱ་བའི་ཆུ་བོ་དེ་ལ་གྲུར་ཞུགས་ནས་ཕེབས་པས་གྲུ་བྱིང་ནས་ཤིན་ཏུ་ཉེན་ཆེ་བ་བྱུང་བ་ན། རྗེ་འདིས་རྗེ་སངས་རྒྱས་རིན་ཆེན་ལ་གསོལ་བ་དྲག་ཏུ་བཏབ་པས། བྱ་རོག་ཅིག་གྲུའི་རྟ་མགོའི་སྟེང་དུ་བྱུང་ནས་འཇིགས་པ་ལས་གྲོལ་བ་དང་། གཞན་ཡང་བདག་ཉིད་ཆེན་པོ་འདིས་བྱང་རྭ་སྒྲེང་བསྐོར་བར་ཕེབས་ཏེ་སླར་ཡར་ཕེབས་པའི་ལམ་དུ་བླ་མ་དགེ་དགའ་བ་བྱ་བ་དང་། མལ་གྲོ་སྒྲུབ་ཆེན་པའི་སློབ་མ་བླ་མ་སྦལ་པ་བློ་གྲོས་བྱ་བ་སྦྱོར་དྲུག་གི་ཐུགས་དམ་ཤིན་ཏུ་སྨིན་པ་གཉིས་ཀྱི་རྨིས་ལྟས་སུ། རྗེ་འདི་འཇམ་དབྱངས་དངོས་ཡིན་པའི་མཚན་མ་སོགས་རྟགས་ཁྱད་པར་བ་མང་དུ་བྱུང་བར་གྲགས་པ་དང་། ཁྱད་པར་འབབ་རོང་གི་གནས་མཆོག་ཏུ་ཕེབས་པའི་ཚེ། ཕེབས་ལམ་གྱི་བྲག་སྲུབ་ཅིག་ཏུ་སྐྱེ་བོ་མང་པོ་ལ་འདྲེ་སྲིན་གྱི་གནོད་པ་མི་འབྱུང་བའི་ཕྱིར་རྡོ་ལ་ཞབས་ཀྱི་རྗེས་ཤིན་ཏུ་གསལ་བ་འཇོག་པ་མཛད་པ་ན། དེ་ཉིད་ཀྱི་སྙན་གྲགས་ལ་བརྟེན་སྐུ་ཚེའི་བར་ཆད་དུ་སོང་དོགས། །མཐོའི་འོག་ཏུ་གནོན་གསུངས་པའི་བཀའ་ཕེབས་པ་བཞིན་འཁོར་རྣམས་ཀྱིས་བཀའ་བཞིན་བསྒྲུབ་ཅེས་ཉིད་ཀྱི་སྐུ་འཁོར་བ་རྣམས་གླེང་བར་གྲགས་ཤིང་། གཞན་ཡང་དེར་སྐབས་དགུན་ཤིན་ཏུ་གྲང་བའི་དུས་ཡིན་ཡང་། བྲག་གསེབ་ནས་འཇམ་དབྱངས་མེ་ཏོག་མང་པོ་འཁྲུངས་པ་སོགས་མདོར་ན་དེ་དག་ལ་སོགས་པ་