[A:209a]bdag nyid chen po rang gi zhal nas/ skabs shig pu tra 'di deng sang cha lugs 'gyur 'dug gsung ba sogs mdor na mkha' 'gro chos skyong mi ma yin sogs thams cad bran du khol zhing las bsgrub pa zhig go /yang mngon par shes pa'i yon tan ni/ gdul bya 'ga' zhig la khyod kyi tshe tshad 'di'o zhes gsungs pa thams cad kyang ji lta ba bzhin thog tu khel ba byung ba dang / kha cig gi bsam pa dang spyod pa'i 'gro ldog la sogs pa'i gnas tshul thams cad kyang ji ltar yod pa ltar dgongs te dngos su gsung byon pa dang / 'ga' zhig gi yid the tshom du gyur pa dri ba zhu ma nus pa yod pa rnams la/ chos gsung ba sogs kyi 'phros la zhal ta gsal por gnang ba la sogs pa mtha' yas shing / yang lan cig nyi shar dpon chen gyi sras rje btsun par grags pa dang / rje kun dga' rgyal mtshan pa gnyis kyis rje 'di'i sku mdun du 'ong ba na/ rje'i sku mdun gyi pha tshad de na gzungs thag gcig 'dug pa de khyer shog nged rang rtsed mo byed pa yin gsungs te/ da khyed gnyis kyis nam mkha' la mthon po gyis la phan tshun du 'then gsungs pa la/ khong gnyis kyis de bzhin byas pas/ rje nyid rdo rje skyil krung mdzad cing gzungs thag de'i steng du byon nas yun ring po'i bar bzhugs te rdzu 'phrul bstan nas/ de nas khong gnyis la de bzhin gzhan la ma zer ces gsungs zhes kyang grags so/ /de ltar bla ma dang lhag pa'i lha rnams kyi zhal bstan cing byin gyis brlabs pa dang / mngon shes dang / rdzu 'phrul thogs pa med pa la sogs pa thun mong dang thun mong