[A:208b]gshed dmar gyi sgrub mchod mdzad skabs gshed dmar gyi dkyil 'khor mngon sum du gzigs shing / nang mchod byin rlabs kyi tshe/ nang mchod kyi ka pA li la me dngos su 'bar ba zhabs drung na yod pa kun gyis mthong ste ngo mtshar du gyur pa na/ rje'i gsung las/ 'di ye shes kyi me yin mod gsung ba la sogs pa gzigs snang khyad par can dpag tu med pa byung zhes thos la/ yang mkha' 'gro chos skyong gis bka' nod pa'i tshul ni/ dbu rtser bzhugs dus mnal lam du gtsug lag khang gi khyams mthil du gur gyi mgon po'i rnam pa gsal zhing mtshan nyid thams cad yongs su rdzogs pa cig dang por gzigs/ de nas de res 'ga' phyag drug pa'i rnam pa/ res 'ga' phyag bzhi pa'i rnam pa sogs rnam 'gyur mi 'dra ba mang du ston pa cig byung ba na/ de gsum ngo bo gcig yin zer ba'i brdar 'dug snyam pa'i nges shes thugs la 'khrungs pa dang / yang lan cig ngam ring du 'jam dkar la gsung bsnyen mdzad pas nyi ma shar tsam na/ dpal ldan lha mo 'dod khams ma dpon g.yog gnyis dre'u nag po la chibs nas bar snang la sha ra ra byung ba gzigs pa dang / lha khang bla brang na bzhugs skabs shig kyang dpon po ri'i rtse la shar phyogs nas rgyang gis byung ba gzigs pa sogs lan mang du gzigs snang la byung bar rje nyid kyis gsungs so zhes bshad la/ yang dbu rtser bzhugs skabs dur khrod bdag po yab yum gnyis mdun nas gar stabs ling ling mdzad pa sogs rnam 'gyur khyad par ba du ma mdzad kyin phebs pa mngon sum gzigs pa dang / gzhan yang