[A:207a]po sku khams bde zhing thugs rig shin tu dwangs pa la/ de nas yun du ma zhig song tsa na sku lus thams cad zi ber langs nas/ yang mnal du song tsa na bsnyung gzhi med par sngar bas kyang sku khams bde zhing / ting nge 'dzin dpag tu med pa thugs la 'khrungs/ des rkyen byas nas rje btsun gong ma'i bka' 'bum bzhengs pa'i 'dun pa byung ba yin zhes gsungs zhes kyang grags la/ yang gnas de nyid du sku mtshams la bzhugs pa'i skabs shig mnal lam du/ g.yabs chen gyi rje btsun chen po'i chos khri de'i steng na rje sa chen dang / rje btsun rin po che grags pa rgyal mtshan te yab sras gnyis ka bzhugs 'dug pa dang mjal nas phyag dang mchod pa phul te/ de'i skabs su thigs khang byang ma'i sgo nang de nas khye'u gzhon nu shin tu mdzes shing yid 'phrog pa rgyan du mas brgyan pa lus las 'od zer 'phro ba zhig byung ba na/ rje sa chen gyi zhal nas 'di 'u cag gi mi yin pas ngo shes pa gyis shig ces ngo sprod byed pa cig byung ste/ khye'u de ni 'jam dbyangs kyi sprul pa yin nges su 'dug ces rje nyid gsung bar bshad pa dang / yang lan cig rwa sgreng du sku mtshams mdzad dus tho rangs mnal lam du/ chos rje thams cad mkhyen pa bsod nams rgyal mtshan gyi gzims khang yin zer ba'i khang bzang dbu rtse rnying ma'i skor las cung che ba zhal ba mdog ser po shin tu legs pa byas pa cig na rje thams cad mkhyen pa'ang bzhugs te/ de'i zhal nas khang pa 'di'i bdag po khyed la bsko ba yin gsungs nas gnang ba cig byung nas de'i mod la mnal sad pa