[A:206b]pa'i bar chad thams cad kyang rang zhir 'gro ba la sogs pa byin rlabs dang nus mthu'i khyad par bsam gyis mi khyab pa zhig mnga' ba yin la/ gzhan yang khams gsum chos kyi rgyal po 'di nyid phyi rol du mkhas pa'i bya ba rgyun mi chad pa mdzad kyang / nang du gsang sngags kyi kun spyod khyad par can la g.yel ba cung zad kyang mi mnga' bas bla ma dang yi dam gyi lha'i zhal gzigs shing lung bstan pa dang / mkha' 'gro chos skyong rnams kyis dgos pa khyad par can gyi tshe bka' nod pa dang / bsams na shes pa'i mngon shes mnga' ba la sogs pa yon tan dpag tu med pa mnga' ste/ de yang skabs shig lha khang bla brang du bzhugs pa'i tshe/ bsnyen sgrub kyi thugs rdo rje'i rnal 'byor gyi rten 'brel sogs la nyams bzhes mdzad pas/ 'dzag pa'i gegs phran bu byung nas thugs cung zad ma bde ba'i tshe nam langs khar mnal lam du dam pa sangs rgyas yin zer ba'i a tsa ra gzi mdangs can phrug dkar po'i na bza' gsol ba cig byon nas/ 'di bzhin gyis gsungs pa'i brdar khong gi zhabs g.yon pa'i rting pas 'og sgo gnyis kyi bar bsdams/ g.yas ri khrod lo ma gyon ma'i bzhugs steng gi rten byas byung bas byang chub kyi sems steng du rtsol med du 'drongs 'ong gis 'dug pa bzhin mdzad pas gegs las grol zhing / yang sa skya'i dbu rtse rnying mar sku mtshams la bzhugs tsa na skabs shig tho rangs kha mnal lam du/ rje sa skya pa chen po dang mjal ba'i ngang la rje sa chen bdag nyid chen po rang gi thugs kar thim par gyur te de'i mod la mnal sad tsa na/ dang