[A:184a]phebs pa'i chibs kha bsgyur te/ lam bar rnams su yang gdul bya dpag tu med pa smin grol la bkod cing rim gyis phebs pa na/ sngar gcen rgya dkar shes rab rgyal mtshan gyis khams phyogs la phebs pa'i dus su btab pa'i dgon pa don grub gling zhes bya bar spyan drangs te phebs pa'i tshe/ dus phyis sa phyogs der sa skya pa'i gdung brgyud sogs 'byon bzhud nyung ba'i stabs kyis mi bdag bdag tu re ba'i rlom sems can/ yul de nas pha tshad phyin pa na karma pa'i sgar pa dpon slob tshan gcig yod pa rnams kyis/ rje nyid der phebs pa la phrag dog gis kun nas bslangs pa'i skur zhus sogs mi dad pa'i rnam 'gyur mang po byas pa dang / der gnas pa'i grwa pa rnams kyis ma bzod de/ sa skya pa mthu'i bdag po yin pas da lan bstan pa la dgongs nas 'di rnams la mthu'i rtags thon pa cig cis kyang mdzad dgos/ de bzhin ma mdzad na phyin chad phyogs 'dir sa skya pa'i sgra tsam mi grag pa cig yong zhes yang yang nan bskyed nas zhus pa la brten nas/ khong rnams la zhag bdun gyi dus btab nas dpon slob bdun gyis pu tra la brten pa'i las sbyor zhig mdzad pa na/ zhag gsum song ba'i nub mo sgrub khang du 'od 'khyug pa dang / thog 'tsheg pa dang / 'brub khung du lingga skad ngan 'don pa sogs nang rtags kyi cho 'phrul sna tshogs zhig byung zhing / /de dus karma pa'i sgar de'i dpon 'og ma bka' bgros pa/ rje nyid la skur zhus byed pa'i gtso bo gcig yod pa de rgyu ma rul nas nyam thag pa'i skad 'don zhing tshe'i dus byas/ de ltar drag po'i las kyi