[A:183b]par mdzad de/ de yang snang gsum gyi khrid rnams dge ba'i bshes gnyen mang po dang lhan cig tu gsan cing / sngags lam tshugs nas dpon slob nyung shas la tshogs bshad zab khrid kyi tshul du gnang / de nas gsol ja lta bu re'i bar la thun mong ma yin pa'i slob bshad snyan brgyud du bzhugs pa rnams rje 'di nyid kho na la chig brgyud du gnang ste/ de ltar lam 'bras yongs su rdzogs pa zhar byung dang bcas pa dang / kye rdo rje'i rgyu lam gyi dbang dang / gzhan yang 'di dang 'brel ba'i byin rlabs dang / yig cha'i lung la sogs pa chos kyi sgo du ma gsan cing / gsung ngag rin po che'i bstan pa rje 'di la gtad par mdzad pa dang / de'i sras kyi thu bo zha lu ba sangs rgyas dpal bzang dang / grub chen dkon mchog blo gros/ chos rje blo gros rin chen/ chos rje dpal ldan rgyal po rnams la yang dbang dang byin rlabs/ rjes gnang / lung man ngag mang po zhig gsan te thos pa rgya mtsho'i pha rol tu son par gyur to/ /de nas mus su bzhugs pa'i skabs der/ a gro dge grags bya ba cig dang / dbon po chos dge phan la sogs pa khams pa'i grwa pa 'ga' zhig gis khams phyogs la skor cig phebs na bstan pa dang sems can la phan pa rgya chen po 'grub tshul sogs rgyu mtshan nan gyis phul bas zhal gyis bzhes te/ de bzhin gyi rgyu mtshan sems dpa' chen po la phul ba na/ de bzhin gnang na legs pa 'ong gsung ba'i bka' lung gnang sbyin rdzong ba dang bcas pa gnang ste/ de nas spre'u'i lo de'i ston sa skya ru phebs nas/ de nas dpon slob nyung shas shig khams phyogs su