[A:182b]thang du srod la gsang thabs su phebs pas/ mtsho por phebs pa dang / mtsho po nang pa bsod nams dpal 'byor bya bas chibs pa dang 'phral kyi sku chas 'dra yang phul/ de nas rim gyis phebs pas mus su mus chen sems dpa' chen po dkon mchog rgyal mtshan gyi drung du gegs med du mjal/ mjal ma thag tu thugs kyi dad pa tshad med pa 'khrungs shing / rje sems dpa' chen pos kyang bsu ba ser phreng sogs bkur sti dpag tu med pa gnang zhing / de nas bdag nyid chen po 'di rten rnams kyi nang nas dge slong gi rten nyid mdo rgyud mang po nas lan cig ma yin par yang yang bsngags pa rgya cher brjod cing mchog tu gsungs pa rnams kyis thugs yid 'phrogs te/ lo de'i tha skar zla ba'i tshes bcu'i nyin mkhas grub du mas zhabs kyis bcags pa'i gnas mchog ya ma bde ldan chos rdzong gi ri khrod du mkhan po yongs rdzogs bstan pa'i mnga' bdag rje sems dpa' chen po nyid dang / las kyi slob dpon zha lu ba chos rje sangs rgyas dpal bzang / gsang ste ston pa'i slob dpon sle lung mkhan po dkon mchog blo gros pa/ 'dul ba 'dzin pa chen po blo gros rin chen pas grib tshod pa mdzad de dad pa'i dge 'dun 'khor 'dul ba 'dzin pa bcu gnyis dang bcas pa'i dbus su sangs rgyas kyi bstan pa la zhugs la yongs su rdzogs pa bsnyen par rdzogs pa'i dge slong gi dngos por bsgrubs te ngur smrig gi rgyal mtshan 'dzin pa kun gyi gtsug gi nor bur gyur nas/ de nas bzung ltung ba sde lnga char gtogs dang bcas pa'i dri ma mtha' dag dang bral zhing / khrims nyis brgya lnga bcu rtsa