[A:168b]'khor chen po de nyid dang / sprul pa'i chos rgyal chen po rnams kyis dngos su byin gyis brlabs nas 'jig rten gyi sgron ma chen por gyur cing / rgya chen chos kyi mdzod 'dzin pa'i bdag nyid chen po bde bar gshegs pa'i bka' bsdu ba por gyur nas/ gangs can gyi skye dgu rnams kyi mig dam par gyur pa'i lo pan skyes mchog khyad par can rnams kyis chos kyi rnam grangs mtha' yas pa bsgyur zhing gtan la phab pa'i gnas/ chos bzang lha'i mdun sa dang mtshungs pa'i bsti gnas dpal bsam yas lhun gyis grub pa'i gnas mchog der/ dgung lo drug cu re gnyis bzhes pa'i tshe legs par bskor ba'i chos kyi 'khor lo 'di gnyis ni kha ba can gyi ljongs 'dir sngon rabs byon pa'i skyes bu dam pa sus kyang bskor ma myong ba'i chos kyi 'khor lo bskor ba sogs/ de ltar chos dang zang zing gnyis ka'i sgo nas lha dang mir bcas pa'i 'gro ba thams cad kyi yid dga' mgu rangs par mdzad cing / de lta bu'i bstan pa'i bya ba gang zhig mdzad pa'i gnas skabs kun tu yang / nang du ting nge 'dzin gyi nyams bzhes las nam yang g.yo med du mdzad ces grags te/ de yang dam pa 'di nyid kyis dus rgyun du mdzad pa'i thugs dam gyi rim pa ni/ nub mo nyal ba'i rnal 'byor gyi ngang nas tho rangs kyi cha la babs pa na/ bla ma'i rnal 'byor thugs la dran pa'i ngang nas bzhengs te/ bla ma'i rnal 'byor gsal btab nas tshar gsum khug pa'i man ngag rnams rdzogs par tshar ba dang / sbyor drug gsan nas de'i lugs kyi rlung sbyor de dus phyis gtso bor mdzad/ de gong du lam 'bras kyi