[A:165b]gsung rab kyi mdzod 'dzin pa'i skyes chen khyad par can du ma zhig gis thog drangs pa'i sdom brtson sde snod 'dzin pa gtsang phyogs kyi sa cha na yod pa phal che ba zhig 'dus nas/ zla ba bzhi tsam gyi bar du dpal dus kyi 'khor lo'i rgyud 'grel gyi bshad bka' la sogs pa chos kyi rnam grangs mtha' yas pa zhig gsungs pas/ gtsang phyogs kyi dus 'khor gyi 'chad nyan gcig la de rang sde snod 'dzin pa'i mkhas pa 'dus pa mang bar yang grags shing / gzhan yang bdag nyid chen po 'dis nyan po dgon par pha rol tu phyin pa'i chos kyi tshul mang po zhig gsungs pas/ de'i snga rol zhag 'ga' na 'phen yul gyi gro sa kun mkhyen zhes pa pha dam pa dang / sha wa ri dbang phyug la sogs pa zhal gzigs shing gsung gleng yod pa/ sgrub pa rtse gcig tu mdzad pa'i mkhas grub chen po zhig bzhugs pa'i ting nge 'dzin gyi snang ba la nyan po dgon pa na bcom ldan 'das shAkya thub pa 'khor mang po la chos gsung gin 'dug pa cig byung bas/ de nas zhag kha cig 'das pa na bdag nyid chen po 'dis der phar phyin gsungs pa de byung bas/ mkhas grub chen po de yang rdzogs pa'i sangs rgyas kyis chos gsungs pa dang chos rje 'dis chos kyi 'khor lo bskor ba gnyis khyad par med pa lta bu'i dad pa skyes zhes grags shing / de'i dus su stod lung nas dge bshes shes rab rdo rje bya bas grogs po mang po dang bcas pa chos rje'i drung du mjal du 'ong bas/ chos rje nyan po'i chos khri'i steng na bzhugs pas/ rgyang ring po nas 'jam pa'i dbyangs nyid 'od zer dang bcas nas chos gsungs pa mngon sum du