[A:161a]blos dpag par dka' ba zhig gsan te/ mdor na mkhan chen bu ston rin po che'i gsan yig tu yod pa'i sngags kyi skor phal mo che gsan cing thugs su chud par mdzad de/ chos rje bu ston gyis rtsom pa phal cher gyi bskul ba po'ang mdzad la/ gzhan yang 'jig rten dbang phyug gi sprul pa'i skur gyur pas byang chub sems dpa'i spyod pa rlabs chen thugs la 'byongs shing / byang chub sems dpa'i sde snod rgya mtsho lta bu'i pha rol tu son pa'i sems dpa' chen po thogs med pa'i zhal la'ang / khams gsum rnam rgyal gyi dbang la sogs pa mdo sngags kyi lung man ngag du ma gsan cing / bdag nyid chen po 'dis kyang chos kyi dga' ston ci rigs pa stsal la/ gzhan yang sdom brtson dam pa mkhan chen gzhon nu mgon po la bla ma gong ma rnams la ma gsan pa'i dbang / byin rlabs/ rjes gnang mang po dang / bod du ji snyed 'gyur ba'i bya spyod kyi rgyud dang / gdams ngag phran mang po dang / mdo sil bu du ma dang / phal po che'i phyed tsam rnams dang / yang lo chen byang chub rtse mor grags pa la sgra'i skor rnams gsan sbyong mdzad de/ bdag nyid chen pos kyang lo tsA ba 'di la dbang bka' lung bka' du ma stsal zhing / de ltar bka' drin shin tu che ba'i bla ma lnga gtso bor gyur pa'i mkhas grub kyi bla ma bsam gyis mi khyab pa zhig bsten nas thos pa rgya mtsho lta bu zhig mnga' bar mdzad pa zhig yin te/ bdag nyid chen po 'dis rje btsun sku mched sogs gong ma rnams kyi gsan yig la gzigs pa'i tshe/ rje rang gi gsung las/ rje btsun gong