[A:161b]ma'i gsan pa phal che ba zhig da lta nub nas khung gtor 'dug na'ang / da lta yod tshad thams cad thob pa cig byed bsams kyang hor gyis gtser nas thabs ma byung / sngon rje btsun bsod rtse chu bo ganggA tshun chad kyi rdo rje 'dzin pa rnams kyi nang na gsan rgya che bar grags/ ngas kyang de dang cha mthun cig bya bsam yang hor gyis ma ster/ da khyed rnams kyis 'bungs la de bzhin gyis shig ces gsungs pa ltar thugs kyi 'dun pa de lta bu mdzad nas/ bod na bzhugs pa'i chos ji snyed pa phal mo che zhig gsan cing / gsan pa de thams cad la'ang sbyor byung gi brtson 'grus phul du phyin pas bla ma so so'i bzhed srol phyag len phra mo tshun chad kyang so sor ma 'dres la dag gsal thon par mdzad pa ste/ bdag nyid chen po rang gi gsung las/ da lta bod na yod pa gcig la mkhan chen bu ston pa'i brtson 'grus la sus kyang mi do/ de min gzhan zhig la nga yang brtson 'grus chung rgyu med par yod ces gsungs pa ltar yin zhing / de ltar dgung lo nyi shu rtsa drug pa yan chad du gdan sa chen po dang / bo dong e dang / byang chub lung dang / sgro mon can dang / tsha mo rong gi byang chub rdzong dang / brag kha dang / na bza' brag phug rnams su gtso cher bzhugs nas/ sngar brjod pa'i bla ma rnams la chos kyi rnam grangs mang po gsan pa dang / bdag nyid kyang rim gnyis zab mo'i thugs dam la mnyam par 'jog pa dang / mdo rgyud bstan bcos rnams kyi gzigs rtog don du gnyer ba rnams la 'chad pa dang / rtsod pa dang / rtsom pa la sogs pa bstan pa'i bya ba kho nas nyin mtshan kun 'da'