[A:160b]bskyed rdzogs dang 'brel pa mang po gsan cing thugs su chud par mdzad la/ gzhan yang dam pa'i chos la ngoms pa med pa lta bu'i tshul gyis phyi nang gi yon tan mang pos rgyud bltams pa'i rdo rje 'dzin pa chen po gan pa rin chen rgyal mtshan la yang gur rigs bsdus/ gsang 'dus 'jam rdor dang 'phags lugs kyi dbang / dgra nag gdong drug bde mchog bcu gsum ma mai tri lugs/ mahA mA yA/ bde mchog nam mkha' dang mnyam pa'i dbang dang byin rlabs/ a ra pa tsa na'i rjes gnang sogs rjes gnang gi rigs du ma zhig dang / gzhan yang yang dag mar me dgu pa'i dbang dang / phur pa sa lugs kyi dbang / smad las drag po sgrol ba'i rjes gnang gzhan yang rgyud dang / 'grel pa dang / bstan bcos du ma zhig gi lung la sogs pa mang du gsan nas thugs su chud par mdzad cing / yang rtsod pa'i dus kyi thams cad mkhyen pa gnyis par gyur pa'i mkhas mchog bu ston rin po che'i drung du dgung lo rtsa lnga drug tsam nas snga phyir gdan sa chen po nyid dang / bo dong dang / 'bras yul rnams su spyan drangs nas gdan bzhi'i dbang / rdo rje dbyings kyi dbang / dpal mchog rigs bsdus kyi dbang / rtse mo rigs bsdus kyi dbang la sogs pa dbang bskur gyi rigs zab cing rgya che ba du ma dang / rgyud kyi bshad bka' dang / gzhan yang rgyud dang de'i 'grel pa/ sgrub thabs/ dkyil chog man ngag la sogs pa rgya gzhung tshad ldan bsam gyis mi khyab pa zhig dang / bu ston lo tsA ba nyid kyi gsung rab phal che ba la sogs bod gzhung khungs thub so so skye bo'i