[A:156b]legs par thugs su chud de/ dgung lo brgyad pa la rin chen sgang du sde snod 'dzin pa du ma'i dbus su rgya bod kyi mkhas grub du ma dang / yab mes kyi gong ma rnams kyi bzhed srol phyin ci ma log par rnam grangs du ma gsal zhing rgya che ba gsungs pas/ sde snod 'dzin pa thams cad kyang ngo mtshar zhing snyan pa'i grags pa chen po bsgrags/ de nas bla ma de nyid kyi drung du kye rdo rje'i phyag len dang / gzhan yang sa skya pa'i yab mes kyi chos kun mthar phyin par mdzad cing / jo nang pa'i lugs kyi dus kyi 'khor lo'i rdzogs rim zab mo sbyor ba yan lag drug pa'i man ngag dang / thugs rje'i dbang phyug gi dmar khrid zhus pas 'jam pa'i dbyangs kyi zhal gzigs te/ ting nge 'dzin gyi sgo du ma thugs la 'khrungs shing yab bdag nyid chen po la yang 'khor lo bde mchog dang / dges pa rdo rje dang / sgrol ma la sogs pa'i dbang bskur du ma dang / chos skyong che chung gi rjes gnang sogs rjes gnang gi rigs du ma dang / theg pa chen po'i thugs bskyed la sogs pa mang du gsan nas thugs su chud par mdzad/ de nas dgung lo bcu gcig pa la bla chen kun dga' blo gros kyi drung du dge bsnyen gyi sdom pa dang / theg chen sems bskyed/ bde kye yo ga dang bcas pa'i dbang / chos skyong gi skor du ma dang tshogs bdag dmar chen gyi rjes gnang sogs gsan cing / dgung lo bcu drug pa'i dus gzhung lugs rgya mtsho'i pha rol du son pa bla ma dpal ldan seng ge ba la tshad ma'i bstan bcos chen po/ dpal chos kyi grags pa'i rnam 'grel la sogs pa mtshan nyid phyogs du ma