[A:156a]pas/ sku bltams pa'i tshe mtshan nyi ma bde ba'i blo gros zhes btags te/ 'khrungs ma thag nas 'gro ba kun gyi yid du 'ong zhing mdzes pa/ skyon gyi rnam pa gang yang med pa/ yon tan du mas rgyud phyug pa/ dge ba'i bshes gnyen gyi rigs su gyur pa dang / smra shes pa nas dben pa la dga' zhing brkam chags med pa dang / yon tan dang sgrub pa la brtson pa/ byis pa'i spyod pa las 'das pa/ sku gsung thugs kyi rtsal stobs che zhing spobs pa phun sum tshogs pa/ bkur 'os kun la gus pa dang zhe sar ldan pa zhig byung zhes grags la/ gzhan yang sku gzhon nu nyid nas ting nge 'dzin la mnga' brnyes mngon par shes pa dang ldan zhing / chos rje nyan po bsod nams brtan pa la 'khrungs nas zla ba gsum tsam 'das pa na 'khor lo bde mchog dril bu pa'i dbang dang / dgung lo gsum bzhes pa na mkhas grub chen po rong pa shes rab seng ge'i sku rim pa mdzad de/ de'i drung du gshed dmar lha lnga'i dbang bskur ba yang gsan/ gzhan yang bla ma bsam sdings pa zhang las tshe dpag med kyi dbang dang / sgro mon can gyi bla ma bzang po pa las sa lugs kyi 'jam dpal a ra pa tsa na'i lung dang gdams pa nos te/ bla mas kyang sgrub grogs mdzad de/ zla ba gsum tsam mgon po 'jam pa'i dbyangs la sgrub pa mdzad pas thugs rab thogs pa med pa byung ste/ rtsom pa thams cad kyi mgor 'jam pa'i dbyangs la mchod brjod mdzad cing / de nas bla ma rin chen dpal bzang po'i drung du/ rtsa ba'i rgyud brtag pa gnyis pa la gsan sbyong mdzad pas