[A:155b]ches cher gsal bar mdzad pa'i snyan pa'i grags pa lha rnams kyis phyogs kun du bsgrags pas sa'i bdag po chen po'i lung bzang po yang phebs/ ta dben gu shrI'i mtshan dang shel gyi dam kha rnams gnang nas bstan pa'i bdag por mnga' gsol te/ mdor na bla ma 'di'i rnam par thar pa ni 'jam dpal gyi zhing gi bkod pa nas bshad pa bzhin dang / mdo sde rnams kyi zhu ba po dang / 'khor dang sdud pa po 'jam dpal grags pa'i mdzad tshul bsam gyis mi khyab pa rnams kyang bla ma 'di'i rnam par thar pa dang mtshungs pa yin no zhes grags so/ /de ltar bstan pa dang 'gro ba'i don rgya chen po zhig mdzad nas/ dgung lo sum cu so lnga bzhes pa shing pho spre'u'i lo zla ba lnga ba'i tshes bcu gcig la rin chen sgang bla brang gi gzim khang gong mar sku gshegs nas/ pur bzhu ba'i dus su du gseb nas 'jam dbyangs smra ba'i seng ge'i rnam par byas nas bar snang la byon pa yang las dag pa 'ga' zhig gis mthong zhes grags la/
bla ma dam pa bsod nams rgyal mtshan/
bla ma 'di'i gcung ni dpal ldan bla ma dam pa bsod nams rgyal mtshan dpal bzang po zhes grags pa de nyid yin te/ 'di ni bdag nyid chen po lnga bcu rtsa gcig bzhes pa chu pho byi ba'i lo la zha lu khang gsar du 'khrungs shing / ngo mtshar ba'i rnam par thar pa ni bsam gyis mi khyab cing / sa la gnas pa'i byang chub sems dpa'i ye shes kyis kyang dpag par dka' ba zhig mnga' ba yin te/ de yang dang po lhums su 'jug pa'i dus su yum gyi rmi ltas la nyi ma'i dkyil 'khor lto bar bzhugs pa'i snang ba dang / g.yas ru gtsang po 'thungs pa la sogs pa rmis