[A:13b]'dzin cing / /zhes dang / rdo rje 'chang dang 'jam mgon dbyer med pa'i/ /bla ma mchog dang dam pa khyod nyid la/ /khyad par 'ga' yang bdag gis yod ma shes/ /zhes gsungs pa ltar ro/ /de ltar rje sa chen gyi yab 'khon dkon mchog rgyal pos dpal ldan sa skya btab/ gdan sa yun ring du mdzad de bla ma 'brog mi nas brgyud pa'i rgyud kyi bshad pa shin tu dar bar mdzad/ gdul bya mang po smin grol la bkod/ bstan pa'i bya ba rgya cher mdzad nas chu pho rta'i lo dgung lo drug cu re dgu bzhes pa'i tshe ngo mtshar ba'i ltas du ma dang bcas nas sgo rum du bde bar gshegs so/ /gshegs khar zhal chems la/ sa skya 'di klu'i pho brang gi steng na brtsigs yod cing / dus phyis 'byor pa rgyas/ /spyod pa rtsing pas klu'i gnod pa byung nyen yod pas/ grog po mdung tshugs kyi steng du nga'i pur 'di ma nyams pa ril por mchod rten gyi nang du bzhugs su chug gsungs pa'i zhal ta byas pa bzhin/ da lta 'khon sku 'bum du grags pa 'di yin no/ /
bla ma des gong du bstan pa ltar btsun mo gnyis khab tu bzhes pa las/ chen ma rdo rje phyug mo la sras ma byung zhing / btsun mo chung ba yul kha'u'i mdo dkar gong lung ma/ pha ming zhang gzhung gu ra ba/ ma ming ma gcig zhang mo/ de la sras gcig 'khrungs pa sa skya pa chen po kun dga' snying po ste de nyid 'khrungs pa'i tshul ni rgyas par gong du bshad pa ltar yin la/ skyes chen dam pa 'di nyid bltams pa nas brtsams te rim gyis longs spyod dang dbang phyug phun sum tshogs par gyur nas mtho ris yon tan bdun la mnga' mdzad pa yin