[A:14a]no/ /de lta bu'i bla ma chen po de nyid la lung dang rtogs pa'i yon tan ji ltar mnga' ba gnyis kyi/ dang po la gnyis las/ thun mong gi yon tan ji ltar mnga' ba ni/ dang po nyid nas klog yig rtsis la sogs pa la byang zhing lugs kyi bstan bcos rnams dang / skyes pa/ bud med/ dud 'gro/ nor bu brtag pa/ sgyu rtsal/ sman dpyad/ sgra/ snyan ngag sdeb sbyor la sogs pa la mkhas par gyur pa'i tshul de dag gi sgo nas 'jig rten pa kun gyi yid tshim par mdzad pa yin no/ /gnyis pa thun mong ma yin pa'i yon tan la gnyis kyi/ spyir gsan sbyong mdzad tshul ni/ thog ma kho nar yab las kye rdo rje'i dbang zhus te/ de'i thugs su chud pa'i chos rnams ci rigs par gsan no/ /de nas dgung lo bcu gcig lon pa na yab bde bar gshegs te rtsis byas pas/ gshegs rdzong byed pa/ phyi rten gyi 'gram 'ding ba/ gdan sa ba tshud pa rnams nyin gcig la grub na shul du phun sum tshogs pa yong zer bas/ yum na re/ /nyid kyi yab kyang lo tsA ba dang 'brel shin tu che zhing chos 'di brdzun chung zer nas mnyes te/ yab kyi slob dpon yang lo tsA ba yin pas nyid kyang lo tsA ba cig la chos slob dgos shing / nyid chung bas 'o cag gi dgon pa mi zin/ gdan sa yang ba ri lo tsA ba la gtad pa drag zer nas/ ba ri ba g.yu mkhar mo na yod pa spyan drangs te 'phrang brag dmar gnyis bsags nas chos 'khor byed pa/ phyi rten gyi 'gram 'ding ba/ ba ri ba gdan sa ston pa rnams nyin gcig la byas te/ zhing mo che ma gtogs pa'i gzhis tsho bla ma ba ri