[A:126a]kyis kyang rang rang gis ji ltar 'byor pa'i mchod pa dang bsnyen bkur rgya chen po dang / dge ba'i rtsa ba du ma bskyed nas dam pa'i chos gsung bar gsol ba btab cing / bdag nyid chen po 'dis kyang deng sang bod na yod par grags pa'i mdo rgyud man ngag gi skor phra zhing phra ba dang bcas pa thams cad nga la yod pas/ khyed rang so so gang la mos pa'i chos nga la zhus shig ces gsungs nas shin tu zab pa dang rgya che ba'i chos kyi sgo bgrang ba las 'das pa dpe mkhyud med par gnang zhing / zang zing gi sbyin pa rgya chen po yang mdzad de/ /gdan sa chen por de lta bu'i tshul gyis nyin mtshan 'da' bar mdzad cing 'gro ba du ma smin grol la bkod de/ de nas me mo glang gi lo dpyid zla ra ba la rgyal po jim gyim zhes byas pas sbyin bdag byas nas gtsang chu mig ring mor chos kyi 'khor lo rgya chen po bskor ba'i tshe/ bdag nyid chen po 'dis dge 'dun khri phrag bdun lhag pa la zhal zas gya nom pas bsnyen bkur nas/ dge 'dun re re la gser zho re/ sum snam re'i 'gyed mdzad cing zab pa dang rgya che ba'i chos kyi 'khor lo rgya chen po bskor te/ der 'khor 'dus pa dge 'dun khri phrag bdun dang / gzhan yang chos smra ba'i bshes gnyen gzhung lugs du ma'i pha rol tu son pa stong phrag du ma dang / skye bo phal pa dang bcas pa'i 'bum phrag du longs pa la rgyal ba thams cad kyi bgrod pa gcig pa'i lam po che theg pa chen po'i byang chub kyi mchog tu sems bskyed pa gnang ste/ de thams cad kyang 'bras bu bla na med pa rdzogs pa'i byang chub tu nges pa kho nar mdzad pa yin