[A:125b]nas/ hor rgyal po'i mnga' 'og tu gtogs pa'i skye bo phal che ba rnams dkar ba las kyi gzhi bzung / dag pa smon lam gyis mtshams sbyar te yid ches pa chen po gsum dang ldan pa'i sgo nas thar pa bla na med pa'i sar mi 'gyangs par bgrod pa'i sa bon legs par btab pa yin no zhes grags so/ de nas bdag nyid chen po 'dis rgya hor gyi skye dgu rnams thar pa'i lam la bkod nas/ slar yang kha ba can gyi 'gro ba rnams la thugs rjes gzigs shing / thugs brtse bar dgongs nas slob ma'i tshogs rgya chen po dang bcas rim gyis gdan sa chen por byon pa'i lam rnams su yang mi dang mi ma yin pa'i 'gro ba 'byor ba du mas bsu ba dang / bskyel ba dang / mchod pa dang / bsnyen bkur gyi khyad par dpag tu med pa du ma dang / bgrod dka' ba'i chu bo rnams la mi dang mi ma yin pa thams cad kyis zam pa 'dzugs pa la sogs pa dang / mthong ba dang thos pa thams cad kyang ba spu'i tshogs kun nas ldang zhing mchi ma g.yo ba byed pa la sogs pa ngo mtshar ba'i khyad par dpag tu med pa byung zhing / de dag so so'i bsam pa dang khams dang bag la nyal dang mthun par dam pa'i chos du ma bstan nas smin cing grol bar mdzad/ de nas dgung lo zhe gcig pa byi ba'i lo la gdan sa chen por phebs te/ de'i mod la dbus gtsang gi dge ba'i bshes gnyen dam pa'i chos don du gnyer ba du ma dang / sa la dbang pa'i mi chen po mang po yang 'dus shing / gzhan yang 'phags pa'i yul dang kha che la sogs pa nas kyang 'di'i snyan pa'i grags pa thos nas paNDi ta du ma byung ste/ de thams cad