[A:112a]spun zer ba yin gsungs/ bla ma lnga bcu pa 'di la bka' gdams pa kun kyang blta rtog dang lung 'dren 'dra byed par gda' ba/ 'di rgyud gang la brten nas brtsams zhus pas/ 'di rtsa ltung bcu bzhi pa'i rtsa ltung dang po/ gang phyir rdo rje 'dzin pa yis/ /zhes pa'i tshig bzhi pa de'i 'grel pa shlo ka lnga bcu pa 'di yin gsungs so/ /srog gi dbang po 'gags nas zhag gsum rnam shes brgyal ba bzhin du cha zer ba dang / skye ba snga ma'i 'du shes 'ong bya ba dang gnyis gda' ba de ji ltar lags zhus pas/ de zhag phyed brgyal ba bzhin du 'gyur/ zhag phyed dang gsum skye ba snga ma'i 'du shes 'ong / zhag phyed dang bzhi na shi bar nges pa yin gsungs/ bar do la zhag bdun las ring ba e mchis zhus pas/ yun snang ba la zhag pas tshogs ma bsags pa la bar do yun ring po yong ba'ang srid/ tshogs bsags pa la skad cig gi yun las kyang med/ bdun tsho bdun kun shas che ba la btags pa yin gsungs/ bar do'i sems can de byis pa lo lnga lon pa la tshad byas pa de nges sam zhus pas/ de'ang shas che ba la btags pa yin te 'ong / /ma nges gsungs/ yang bar do'i sems can de sa rdo ri brag ci la yang thogs rdugs mi yong ba lags sam zhus pas/ ma'i mngal dang rdo rje'i gdan gnyis po ma gtogs thogs med 'gro/ bgyi ba de gnyis la thogs/ gzhan ci la yang thogs rdugs med gsungs/ de'i rgyu mtshan ji ltar lags zhus pas/ bsgrubs pa'i rdzu 'phrul ma yin te/ /las kyi shugs kyi rdzu 'phrul gyis/ /stong gsum dar cig