[A:93b]'ja' sa mu tig ma bstan zin nas/ da ni 'ja' sa bod yig ma'am/ bande gshed bskyed ma las 'byung tshul bshad par bya ste/ de yang / /oM swasti siddhaM/ bkra shis dang dge legs thams cad kyi 'byung gnas lha dang bcas pa'i 'jig rten thams cad kyi skyabs dkon mchog gsum la phyag 'tshal lo/ /bsod nams rin chen las grub ye shes dkyil 'khor rab rgyas mtshan dang dpe byad kun nas 'bar ba'i sku/ /brtse ba'i rlung gis chos dbyings mkha' la rab bskyod legs bshad gsung zer tsha zer bye ba'i 'od 'phros pas/ /bdud sde rgyu skar zil gnon gzhung lugs ngan pa'i mun sel sna tshogs kun 'jug gdul bya'i 'jig rten gyi/ /blo gros padmo rab tu rgyas mdzad rdzogs pa'i sangs rgyas skye dgu'i sgron me de la phyag 'tshal lo/ /de yi legs gsung kun nas rnam dag gsal zhing ma 'dres pa/ /srid pa'i gdung ba rab tu sel bar byed pa'i bsil zer can/ /rnam par rtog pa'i rab rib 'joms mdzad bdud rtsi'i dkyil 'khor mchog /spros pa rab zhi dam chos zla ba de la kun nas 'dud/ /kun gzhi'i sa gzhir lhag bsam sa bon dad pa'i chu gter dang / /sangs rgyas nyi ma'i gsung zer gyis bskyed dge legs lo 'dab can/ /nyes pa'i 'dam gyis ma gos mkhyen pa'i snying po rab rgyas pa/ /gzhan don sbrang rtsi'i bcud ldan dge 'dun pad tshal rgyas gyur cig /mchog gi sprul sku brnyes kyang mtha' yas gdul bya'i ngor/ /sprul pas tha mal lus bzung dgung lo bcu gnyis la/ /'jam dbyangs zhal gzigs mkhyen brtse'i chos rnams ston mdzad pa/ /snying po'i mtha'