[A:61a]bgrod pa/ mang yul skyid grong 'phags pa wa ti'i gtsug lag khang dang 'dab 'byor ba'i tshong 'dus na bzhugs pa'i tshe/ sngar smos pa'i ston pa drug po der lhag pa na chos rje nyid dang / bde bar gshegs pa'i rten la phyag mi 'tshal bar/ bde legs dang bsngags par 'os pa'i tshigs su bcad pa re re tsam brjod nas gral la 'khod pa na 'di skad smras te/ nged kyi rigs thams cad ni bla ma tshangs pa nas brtsams te deng sang gi bar du gau ta ma'i bstan pa la mi ltos/ dkon mchog gsum la skyabs su 'gro ma myong bas drang srong gi rigs rnam par dag pa kho bo cag yin no zhes dregs shing smra bar byed do/ /de'i dus chos kyi rje 'dis gsungs pa ni/ ci tshangs pa ni ston pa la shin tu gus pa yin na/ 'on kyang de gti mug che bas gnyid kyis non pa min nam/ ji skad du/ rab mchog lag pa bzhi pa bcu drug phyed phyed phyogs kyi gdong pa can/ /bzlas dang nges pa'i cho ga shes shing nges brjod rig byed 'don pa po/ /dri med padma'i skye gnas tshangs pa de yang gnyid log gyur/ /zhes dang / kho bo'i ston pa stobs bcu mnga' ba de ni rtag tu rab tu snga ba nyid du nam langs pa'o zhes gsungs pas/ de dag shin tu ma bzod cing ma rangs pas 'bel ba'i gtam gyi skabs rnyed de/ rgol ba ngan pa de thams cad re re nas sun phyung zhing pham par mdzad de mi smra ba'i brtul zhugs la bkod nas/ slar yang de thams cad kyi lta ba ngan pa'i snyems pa'i dri ma med par mdzad de/ ral pa'i khur dregs nas nyid kyi thad du rab tu byung ste/ nges par 'byung ba rin po