[A:61b]che'i 'byor pa dang ldan par mdzad pa'i skabs su/ /shAkya'i rgyal po de'i bstan pa la rma 'byin pa gang dag byung ba na/ slar yang de bzhin du gdul bar bya'o snyam du dgongs nas 'di gsungs pa/ rgya mtsho'i gos can rgya mtsho'i mthas klas sa chen 'di na lha chen po/ /'phrog byed bran byed de dag lhar byed thub pa drang srong karka sogs/ /rgyas pa grog mkhar ba dang gzegs zan rkang mig ser skya'i rjes 'jug pa/ /thor gtsug shing shun lo ma'i gos can thal ba dbyug gu ku sha thogs/ /ral pa'i khur 'dzin munydzas legs dkris ri dwags g.yang gzhi'i stod g.yogs can/ /so ris gsum mtshan rtse mo can mchod tshangs skud mchod phyir thogs pa 'chang / /rig byed kun sbyangs nges brjod 'don mkhas sgra dang sdeb sbyor mthar son pa/ /bdag tu lta ba'i lta ba la lta rgyun du dka' spyod nga rgyal can/ /de lta'i tshul can mu stegs glang chen rab tu myos pa'i klad 'gems pa/ /dpal ldan smra ba'i seng ge blo gros stobs ldan rigs pa'i mche ba can/ brda sprod byed gzhung yan lag rab rdzogs bde gshegs bstan pa'i ral pas brjid/ /legs sbyar nga ro gtan tshigs gad rgyangs rtag brjod sun 'byin mig bgrad pa/ /de lta'i ri dwags rgyal po de/ /dpal ldan sa skya'i gangs rir gnas/ /blo gsal rnams kyi ri dwags skyong / rgol ba ngan pa'i wa tshogs 'joms/ /da dung du yang mu stegs byed/ /thams cad chos kyis pham byas nas/ /bde bar gshegs pa'i bstan pa'i tshul/ /kun dga'i rgyal mtshan 'dzin par shog /ces gsungs te/ de dag gi ral pa dpal ldan sa skya'i dbu