[A:57b]'dra sgrog par bgyid pa'i ngag /shes ldan gang gis thos de yang / /g.yeng ba gzhan gyis mi g.yeng bar/ /rtse gcig 'dun par gyur pa ni/ /dri za'i bu mo'i dbyangs snyan dang / /khu byug myos pa'i dbyangs kyis kyang / /dpe tsam nyid du yang mi bzod na/ /sgra gzhan zil gnon smos ci dgos/ /zhes pa ltar ro/ /thugs kyi spyod pa yang sngar bshad pa ltar/ mkhyen rab thugs rje 'ba' zhig gis/ /skyo ba med par gsungs pas na/ /sgo gsum kun spyod rnam dag pas/ /bstan pa bsrung phyir gus pas bsgrub/ /ces pa'i kun spyod dang ldan pa'i/ /gtsang mkhas gzhan la phan par 'dod/ /ces nyid kyis gsungs pa'i yon tan dang / mdo sde rgyan las/ de ltar blo bzang skyo ba med ldan brtse ba can/ /snyan par rab grags cho ga bzang shes ldan pa yi/ /byang chub sems dpa' legs par smra ba yin pa ste/ /bshad pas skye bo'i dbus na nyi ma bzhin du lham/ /zhes pa dang / rgya che the tshom spong ba dang / /gzu bos de nyid gnyis ston pa/ /'di ni byang chub sems dpa' yi/ /ston pa phun tshogs yin zhes bya/ /zhes pa dag dang ldan pa yin no/ /des na bdag nyid chen po 'di las 'ongs pa'i gzhung lugs chen po'i bshad srol ni tshad ma rnam 'grel dang / rigs pa'i gter dang / chos mngon pa mdzod dang / kye rdo rje'i rgyud gsum dang / gzhung chen por ma grags kyang bshad pa'i gzhi shin tu mang bar snang bas/ rdo rje'i tshig rkang dang / thub pa dgongs gsal dang / legs par bshad pa rin po che'i gter la sogs pa 'ga' zhig las deng sang mi snang