[A:༢༣༨བ]ཞིང་། །ངེས་པར་འབྱུང་བའི་ཆུ་ཤེལ་ལས་གྲུབ་པའི། །གཞན་ལ་མི་གནོད་བཙུན་པའི་གོས་དཀར་ཅན། །བྱམས་དང་སྙིང་རྗེའི་དཀྱིལ་འཁོར་ཆེས་རྒྱས་པའི། །སེམས་ཉིད་ཉིན་མོར་བྱེད་པའི་འོད་ཟེར་གྱིས། །འགྲོ་བའི་སྡུག་བསྔལ་མུན་པ་དཔྱིས་འབྱིན་པའི། །ཕན་བདེའི་ལམ་བཟང་གསལ་མཛད་སྐྱེ་དགུའི་སྒྲོན། །ཟབ་དོན་ལྗོན་ཤིང་དམ་ཚིག་རྩ་བ་བརྟན། །རིམ་གཉིས་ཡལ་འདབ་ལག་ལེན་མེ་ཏོག་རྒྱས། །ཟུང་འཇུག་འབྲས་བུའི་ཁུར་ལྡན་འཕྲིན་ལས་ཀྱི། །གྲིབ་བསིལ་གཡོ་ལྡན་རིགས་འཛིན་དཔག་བསམ་ཤིང་། །ཞེས་བཙུན་པའི་ཡོན་ཏན་དང་། །བགྲང་ཡས་ཡོན་ཏན་ཀུན་གྱི་རྩེར་འཛེགས་ཀྱང་། །མངོན་པར་ཁེངས་པའི་མདུང་གི་བ་དན་བསྙལ། །སྐྱེ་དགུ་ཀུན་གྱི་གཙུག་གིས་རབ་བཏུད་ཀྱང་། །ཀུན་གྱི་འབངས་ལྟར་གཞན་གྱི་དོན་ལ་དགེས། །སྤྱོད་ལམ་ཀུན་ཏུ་ཞི་ཞིང་དུལ་བའི་ཐུགས། །གྲོགས་ངན་སྡུག་བསྔལ་ཟབ་མོ་ཐོས་མི་སྐྲག །སྐད་ཅིག་ཉོན་མོངས་གོ་སྐབས་གཡོ་མིན་པའི། །མཆོག་ཏུ་ཞི་བས་གཞན་གྱི་ཁྲོ་བའང་འཇོམས། །རྙེད་དང་མ་རྙེད་ལ་སོགས་མགོ་སྙོམས་ཤིང་། །ཕོངས་དང་མགོན་མེད་རྒྱུད་པ་ཀུན་ལས་འཛིན། །ཟབ་བཅས་འཕྲིན་ལས་ངང་གིས་ལྷུར་མཛད་ཅིང་། །རྟག་ཏུ་འདྲེན་པ་ཀུན་གྱི་བྲན་དུ་ཞུགས། །མཛེས་ཤིང་ཡིད་འོང་རྡོ་རྗེ་ལྟ་བུའི་སྐུ། །ཉིན་མཚན་རྟག་ཏུ་ཆོས་ཆར་འབེབས་པའི་གསུང་། །སྙིང་རྗེས་གཞན་དབང་གྱུར་པའི་ཐུགས་མངའ་བ། །ཁྱོད་ཀྱི་མཛད་པ་བྱིས་བློའི་ཡུལ་ལས་འདས། །ཨེ་མ་བདག་ནི་ཚུལ་འདི་མཐོང་བས་ཀྱང་། །སྐྱོན་མེད་རྣམ་པར་ཐར་པ་བསམ་ཡས་ཀྱིས། །མགོན་ཁྱོད་གཞན་ལས་བཟང་པོར་བསྒྲུབ་མིན་ཏེ། །