[A:༢༢༧བ]པ་དང་ཇི་སྙེད་ཐུགས་སུ་ཆུད་པ་ཐམས་ཅད་ཀྱང་བསྙེལ་བ་མེད་པའི་སྤོབས་པ་ཕུན་སུམ་ཚོགས་པ་མངའ་བ་སྟེ། བདག་ཉིད་ཆེན་པོ་རང་གི་གསུང་ལས། གསང་སྟོན་སློབ་དཔོན་ཡོན་ཏན་འབྱུང་གནས་ལ། །འདུལ་བ་མདོ་རྩ་ཀ་རི་ཀ་ལ་སོགས། །ཚད་མ་རྣམ་འགྲེལ་རིགས་གཏེར་སྡོམ་གསུམ་དང་། །ཕ་རོལ་ཕྱིན་པའི་གཞུང་ལུགས་འགའ་ཞིག་མནོས། །སྔགས་ཀྱི་སྡེབས་སོགས་ལག་ལེན་ཕྲན་ཚེགས་བསླབ། །དེ་ལྟར་ཐོས་པའི་གཞུང་ལུགས་ཐམས་ཅད་ལ། །བསམ་པས་སྒྲོ་འདོགས་ཆོད་ཅིང་བསྒོམས་ན་ཡང་། །ཐེ་ཚོམ་མི་ཟ་ཡིད་ཆེས་ཅུང་ཟད་ཡོད། །ཅེས་གསུངས་པས་སོ། །དེ་ནས་ལུག་གི་ལོ་རྗེ་ཉིད་དགུང་ལོ་བཅོ་ལྔ་པའི་དུས་ཡོངས་འཛིན་དཀོན་མཆོག་འཕེལ་བའི་གསུང་གིས། རང་གཞན་གྱི་དོན་གཉིས་བསྒྲུབ་པའི་ཕྱིར་གསུང་བསྙེན་མཛད་དགོས་པའི་བཀའ་སྩལ་བ་ལ་བརྟེན། དགེས་པ་རྡོ་རྗེའི་དཀྱིལ་འཁོར་གྱི་བསྙེན་པ་སྦྱིན་སྲེག་དང་བཅས་པ། རྡོ་རྗེ་ཕུར་པའི་བསྙེན་པ། ནག་པོ་ཆེན་པོ་གུར་གྱི་མགོན་པོའི་བསྙེན་པ་རྣམས་མཐར་ཕྱིན་པ་མཛད་པས། དེ་དག་གི་སྐབས་སུ་ཀྱེ་རྡོར་དང་། རྡོ་རྗེ་གཞོན་ནུ། གུར་མགོན་རྣམས་ཞལ་གཟིགས་པ་ལ་སོགས་པ་གྲུབ་པའི་མཚན་མ་མང་དུ་བྱུང་བར་གྲགས་ལ། དེ་ནས་ཡང་རྒྱལ་བའི་བསྟན་པ་ལ་ཞུགས་ལ་ཡོངས་སུ་རྫོགས་པ་ནི་དགེ་སློང་ཉིད་ཡིན་པར་དགོངས་ནས། དགུང་ལོ་ཉི་ཤུར་ཕེབས་པ་ཤིང་ཕོ་བྱི་བའི་ལོ་མཁན་པོ་སྔར་གྱི་དགེ་ཚུལ་མཛད་པ་པོ་དེ་ཉིད་དང་། ལས་ཀྱི་སློབ་དཔོན་འཇམ་པའི་དབྱངས་སངས་རྒྱས་རིན་ཆེན་དཔལ་བཟང་པོ་དང་། གསང་སྟོན་རྭ་སྟོན་ཡོན་ཏན་འབྱུང་གནས་ཀྱིས་མཛད་དེ། དགེ་འདུན་བཅུ་ཕྲག་ཕྱེད་ཀྱི་