[A:7]བླ་མ་དང་སློབ་མའི་རྣམ་པར་རྩེན་པ་སོགས་ཇི་སྙེད་སྟོན་པ་འདི་དག་ལ་ཇི་ལྟར་བརྗོད་ཅེ་ན།
རྣམ་པ་སྣ་ཚོགས་སྟོན་པ་འདི༎
སྤྲུལ་པ་ཡིན་གྱི་རང་རྒྱུད་མིན༎
ཞེས་པའི་དོན་དང་མཐུན་པར་གྱུར་པ་སྟེ། དཔེར་ན། མཁན་ཆེན་གཡག་པ་དང། བག་སྟོན་གཉིས་ཀའི་སྐུའི་སྐྱེ་བར་བདག་ཉིད་ཆེན་པོ་འདི་རྗེས་སུ་སྒྲོག་ཅིང། དེ་གཉིས་དུས་མཚུངས་པའི་དཔོན་སློབ་དུ་གྱུར་པས་ཀྱང་མཚོན་པ་ལས་སོ༎
དེས་ན་གཡག་བསྟོད་དུ།
གསང་ཕུར་བྱམས་པའི་ཆོས་ལྔ་གསུངས་པའི་ཚེ༎
ཅིག་ཅར་སྐུ་ལུས་བཀོད་པ་དུ་མ་བསྟན༎
གདུལ་བྱ་རྣམས་ཀྱི་ཐེ་ཚོམ་གཅོད་མཛད་ཅིང༎
ངོ་མཚར་དང་བ་བསྐྱེད་ལ་ཕྱག་འཚལ་ལོ༎
ཞེས་འབྱུང་བའི་ཅིག་ཅར་སྐུ་ལུས་བཀོད་པ་དུ་མ་བསྟན་པའི་དབང་ལས་གོང་གི་འགལ་བ་སྤོང་ནུས་ཤིང། ཡང་གཡག་བསྟོད་དེ་ཉིད་དུ།
སྔོན་ཚེ་མ་ག་དྷ་ཡི་གཙུག་ལག་ཏུ༎
ལྔ་རིག་པཎ་ཆེན་བཅུ་ཡི་མཆོག་གྱུར་ཅིང༎
ཕྱོགས་བཞིའི་མུ་སྟེགས་སྟོན་པ་ཕམ་མཛད་ནས༎
གངས་རིའི་ཁྲོད་འདིར་འཁྲུངས་ལ་ཕྱག་འཚལ་ལོ༎
ཞེས་འབྱུང་བས་ན། ཉང་སྟོད་རབ་འབྱམས་པ་ལྷུན་གྲུབ་དཔལ་བཟང་པོའི་ཐུགས་མྱོང་ལས། དབྱིག་གཉེན་ཆོས་གྲགས་རིན་ཆེན་འབྱུང་གནས་ཞི་བ་སྟེ་ཡོངས་སུ་གྲགས་པའི་ཤནྟི་བ་རྣམས་ཀྱི་སྐུའི་སྐྱེ་བར་དགོངས་ཤིང་བཀའ་སྩལ་དུ་བྱོན་པ་ལ་ཡང་ཀླན་ཀའི་གནས་མེད་པའོ༎
ཞེས་པཎྜི་ཏ་ཆེན་པོ་ཤཱཀྱའི་མཚན་ཅན་གྱི་སྔོན་བྱུང་གི་གླེང་བསླང་མདོར་བསྡུས་པའི་ངག་སྟེ། དེ་དག་ལ་དཔགས་ནས་བློ་གྲོས་གསལ་བའི་སྨྲ་བ་པོ་དག་གིས་བརྗོད་པར་གྱིས་ཞིག་ཀྭའི༎ ༎
ཇི་སྙེད་སྐྱེ་བར་མངོན་པར་བྱང་ཆུབ་ཚུལ༎
བགྲང་ཡས་ལྕེ་ཡིས་བརྗོད་ཀྱང་ག་ལ་ལྡང༎
རྒྱུ་སྐར་གྲངས་དང་མཁའ་དབྱིངས་འདོམ་འཇལ་ལྟར༎
སྨྲ་བ་པོ་དག་རང་ཉམས་བྱིས་པར་མཚོན༎
ཚད་མེད་ཚད་ཀྱིས་གཞལ་བའི་ཡུལ་མིན་ཞིང༎
དངོས་མིན་དངོས་པོའི་རང་བཞིན་རྟོགས་དཀའ་བས༎
བློ་ཆུང་བློ་ཡི་ཁྱོན་དུ་ཆུད་མིན་ཕྱིར༎
གསང་ཚིག་གསང་བའི་རྒྱ་ལྡན་དམ་པའི་