[A:7]bla ma dang slob ma'i rnam par rtsen pa sogs ji snyed ston pa 'di dag la ji ltar brjod ce na/
rnam pa sna tshogs ston pa 'di//
sprul pa yin gyi rang rgyud min//
zhes pa'i don dang mthun par gyur pa ste/ dper na/ mkhan chen g.yag pa dang/ bag ston gnyis ka'i sku'i skye bar bdag nyid chen po 'di rjes su sgrog cing/ de gnyis dus mtshungs pa'i dpon slob du gyur pas kyang mtshon pa las so//
des na g.yag bstod du/
gsang phur byams pa'i chos lnga gsungs pa'i tshe//
cig car sku lus bkod pa du ma bstan//
gdul bya rnams kyi the tshom gcod mdzad cing//
ngo mtshar dang ba bskyed la phyag 'tshal lo//
zhes 'byung ba'i cig car sku lus bkod pa du ma bstan pa'i dbang las gong gi 'gal ba spong nus shing/ yang g.yag bstod de nyid du/
sngon tshe ma ga dha yi gtsug lag tu//
lnga rig paN chen bcu yi mchog gyur cing//
phyogs bzhi'i mu stegs ston pa pham mdzad nas//
gangs ri'i khrod 'dir 'khrungs la phyag 'tshal lo//
zhes 'byung bas na/ nyang stod rab 'byams pa lhun grub dpal bzang po'i thugs myong las/ dbyig gnyen chos grags rin chen 'byung gnas zhi ba ste yongs su grags pa'i shanti ba rnams kyi sku'i skye bar dgongs shing bka' stsal du byon pa la yang klan ka'i gnas med pa'o//
zhes paNDi ta chen po shAkya'i mtshan can gyi sngon byung gi gleng bslang mdor bsdus pa'i ngag ste/ de dag la dpags nas blo gros gsal ba'i smra ba po dag gis brjod par gyis zhig kwa'i// //
ji snyed skye bar mngon par byang chub tshul//
bgrang yas lce yis brjod kyang ga la ldang//
rgyu skar grangs dang mkha' dbyings 'dom 'jal ltar//
smra ba po dag rang nyams byis par mtshon//
tshad med tshad kyis gzhal ba'i yul min zhing//
dngos min dngos po'i rang bzhin rtogs dka' bas//
blo chung blo yi khyon du chud min phyir//
gsang tshig gsang ba'i rgya ldan dam pa'i