[A:5]ལུང་བ་བསྟན་པའི་ཚིག་རྣམས་ཀྱང་འདིར་ཡང་སྦྱོར་ཏེ། དཀར་ཡོལ་རི་སོགས་ཕན་ཚུན་གྱི་དཀར་པོ་བྲག་གི་མིང་བཞག་དང། ངའི་མིང་ཞེས་པས་ཤཱཀྱ་ཚེ་རིང་པོ་ཞེས་པའང་ཀུན་མཁྱེན་ཆེན་པོ་བདུན་ཅུ་ཙམ་ལས། པཎ་ཆེན་རིན་པོ་ཆེ་བརྒྱད་ཅུའི་མཐར་སོན་པ་དང། གྲུབ་པའི་མཐའི་ཚུལ་ཟུར་ཅན་དངོས་གནས་རྣམས་མཚོན་དོན་དུ་བགྲངས་ནས། མདོ་དེ་ཉིད་ཀྱི་ལུང་གིས་བསྟན་པའི་སྐྱེས་བུ་མཆོག་ཉིད་ཡིན་པར་འབད་དེ་སྒྲུབ་པར་མཛད་དོ༎
གཞན་སྔ་ཕྱི་རྣམ་ཐར་གསུམ་ཀ་གུང་མཐུན་པར། སློབ་དཔོན་པདྨའི་མ་འོངས་ལུང་བསྟན་དུ། རྟ་དབྱངས་སྐྱེ་བ་ཤཱཀྱའི་མཚན་ཅན་ལོ་བརྒྱད་ཅུ་པ་ཞིག་གིས་སངས་རྒྱས་ཀྱི་བསྟན་པའི་ཁྲིམས་འཆའ་བར་གསུངས་པ་དང། པཎ་ཆེན་རིན་པོ་ཆེ་ཉིད་ཀྱིས་ཡེ་ཤེས་གཟིགས་པའི་ཡུལ་དུ། རྔོག་ལོ་ཙ་བ་བློ་ལྡན་ཤེས་རབ་དང། པ་ཚབ་བུ་བཞིའི་ཡ་གྱལ་རྨ་བྱང་ཆུབ་བརྩོན་འགྲུས་ཀྱི་སྐྱེ་བར་ལེགས་པར་དགོངས་པའི་བཀའ་སྩལ་དངོས་ལས་ཐོས་ཚུལ། མཁས་གྲུབ་ཀྱི་སྐྱེས་བུ་བདུན་ཙམ་རིམ་ཅན་དུ་བརྒྱུད་རྗེས། ཁམས་ཡུལ་དུ་བག་སྟོན་ཤཱཀྱ་འོད་ཟེར་དུ་འཁྲུངས་ཤིང། དེ་ཉིད་ཀྱིས་རང་གི་ཡུམ་སོགས་ལ་བཀའ་བསྒོས་ནས། སྐུ་སྐྱེ་བ་ཕྱི་མའི་ལུང་བསྟན་ཇི་ལྟར་གནང་ཚུལ་དག་ཅིག་ལ་གཅིག་བྲིས་བཤུས་མཛད་པ་ལྟར་ཡོད་ཅིང། ངོ་གྲོ་རབ་འབྱམས་པ་དབང་ཕྱུག་དཔལ་བས་པཎ་ཆེན་རིན་པོ་ཆེ་ལ་བསྟོད་པ་ཕུལ་བའི་ནང་ན་བག་སྟོན་ཤཱཀྱ་དང། ཀརྨ་པ་རོལ་པའི་རྡོ་རྗེ་ཐུགས་རྒྱུད་གཅིག་པར་གྲགས་པས། རྒྱལ་དབང་ཀརྨ་པའི་རྣམ་འཕྲུལ་དུ་མཚོན་པའི་ཚིག་སྦྱོར་བྱས་པའི་ཡི་གེ་རྒྱལ་དབང་ཆོས་གྲགས་རྒྱ་མཚོ་དང། པཎ་ཆེན་རིན་པོ་ཆེ་གཉིས་ཀའི་གཟིགས་ལམ་དུ་འབྱོར་སྐབས། ཕན་ཚུན་གཉིས་ཀ་ནས་དགོངས་པའི་དབྱིངས་སུ་མི་འབྱོར་བ་མ་བྱུང་ཞེས་ཀྱང་གཏམ་དུ་གླེང་ཞིང། ཆོས་རྗེ་ཀརྨ་པ་ཆེན་པོ་ཆོས་གྲགས་རྒྱ་མཚོས། སྡེ་བདུན་རབ་འབྱམས་པ་དབང་ཕྱུག་རྒྱལ་མཚན་པ་ལ་དངོས་ཀྱི་བཀའ་ལུང་བྱོན་པ་ལ་ཡང།