[A:5]lung ba bstan pa'i tshig rnams kyang 'dir yang sbyor te/ dkar yol ri sogs phan tshun gyi dkar po brag gi ming bzhag dang/ nga'i ming zhes pas shAkya tshe ring po zhes pa'ang kun mkhyen chen po bdun cu tsam las/ paN chen rin po che brgyad cu'i mthar son pa dang/ grub pa'i mtha'i tshul zur can dngos gnas rnams mtshon don du bgrangs nas/ mdo de nyid kyi lung gis bstan pa'i skyes bu mchog nyid yin par 'bad de sgrub par mdzad do//
gzhan snga phyi rnam thar gsum ka gung mthun par/ slob dpon padma'i ma 'ongs lung bstan du/ rta dbyangs skye ba shAkya'i mtshan can lo brgyad cu pa zhig gis sangs rgyas kyi bstan pa'i khrims 'cha' bar gsungs pa dang/ paN chen rin po che nyid kyis ye shes gzigs pa'i yul du/ rngog lo tsa ba blo ldan shes rab dang/ pa tshab bu bzhi'i ya gyal rma byang chub brtson 'grus kyi skye bar legs par dgongs pa'i bka' stsal dngos las thos tshul/ mkhas grub kyi skyes bu bdun tsam rim can du brgyud rjes/ khams yul du bag ston shAkya 'od zer du 'khrungs shing/ de nyid kyis rang gi yum sogs la bka' bsgos nas/ sku skye ba phyi ma'i lung bstan ji ltar gnang tshul dag cig la gcig bris bshus mdzad pa ltar yod cing/ ngo gro rab 'byams pa dbang phyug dpal bas paN chen rin po che la bstod pa phul ba'i nang na bag ston shAkya dang/ karma pa rol pa'i rdo rje thugs rgyud gcig par grags pas/ rgyal dbang karma pa'i rnam 'phrul du mtshon pa'i tshig sbyor byas pa'i yi ge rgyal dbang chos grags rgya mtsho dang/ paN chen rin po che gnyis ka'i gzigs lam du 'byor skabs/ phan tshun gnyis ka nas dgongs pa'i dbyings su mi 'byor ba ma byung zhes kyang gtam du gleng zhing/ chos rje karma pa chen po chos grags rgya mtshos/ sde bdun rab 'byams pa dbang phyug rgyal mtshan pa la dngos kyi bka' lung byon pa la yang/